काठमाडौं। नेपाल लाइफ इन्भेष्टमेन्ट कम्पनी लिमिटेडको प्रथम वार्षिक साधारण सभा शुक्रबार काठमाडौंमा सम्पन्न भएको छ। कम्पनीका सञ्चालक समितिका अध्यक्ष अमित कुमार कयालको अध्यक्षतामा बसेको सभाले आर्थिक वर्ष २०८१/८२ को वासलात, नाफा–नोक्सान हिसाब, नगद प्रवाह विवरणलगायतका वित्तीय प्रतिवेदनमाथि छलफल गरी पारित गरेको छ। साथै, आगामी आर्थिक वर्ष २०८२/८३ का लागि लेखापरीक्षकमा पि. एल. श्रेष्ठ एण्ड कम्पनीलाई नियुक्त गरिएको छ।

अध्यक्ष कयालले कम्पनीलाई उदाहरणीय बनाउन संरचनात्मक सुधार, संस्थागत सुशासनको पालना, सुदृढ आन्तरिक नियन्त्रण प्रणाली, अनुसन्धान, तालिम, वैज्ञानिक लगानी विविधीकरण र अन्तर्राष्ट्रिय अभ्यासलाई अपनाउँदै काम भइरहेको जानकारी दिए। प्रमुख कार्यकारी अधिकृत सुभाष थापाले आ.व. २०८१/८२ को कार्य प्रगति र २०८२/८३ को रणनीतिक योजनाबारे प्रस्तुतीकरण गरेका थिए।

मुख्य कम्पनी नेपाल लाइफ इन्स्योरेन्सका संचालक कमलेश कुमार अग्रवालले बीमितको लगानी सुरक्षित राखी राम्रो प्रतिफल दिलाउन आग्रह गरे भने, प्रमुख कार्यकारी अधिकृत प्रवीण रमण पराजुलीले लगानी गर्दा सही समय, सही स्थान र सही प्रतिफललाई प्राथमिकतामा राख्न र मूल कम्पनीको ब्रान्ड ख्यातिलाई विकासमा उपयोग गर्न सुझाव दिए।

सभाले नेपाल लाइफ इन्स्योरेन्स कम्पनीबाट सिफारिस भएका चार जना सञ्चालक – कमलेश कुमार अग्रवाल, कृष्णराज लामिछाने, प्रवीण रमण पराजुली र अमित कुमार कयाललाई अनुमोदन गरेको छ।

आजै बसेको सञ्चालक समिति बैठकले कमलेश कुमार अग्रवाललाई नयाँ अध्यक्षमा चयन गरेको छ भने सबै नवनियुक्त सञ्चालकहरूले पदबहाली गरेका छन्।