काठमाडौं । जीवन बीमक संघ नेपालले २०८२ भदौ २९ गते (सेप्टेम्बर १४, २०२५) काठमाडौंमा सम्पन्न छैठौं वार्षिक साधारण सभाबाट नयाँ कार्यसमिति गठन गरेको छ ।

सभाले सर्वसम्मत निर्णय गर्दै नेपाल लाइफ इन्स्योरेन्स कम्पनीका प्रमुख कार्यकारी अधिकृत श्री प्रवीण रमण पराजुलीलाई अध्यक्षमा चयन गरेको हो । विधान अनुसार गठित कार्यसमितिमा उपाध्यक्षमा प्रकाश विक्रम खत्री (सूर्यज्योति लाइफ), सचिवमा नारायण लोहनी (रिलायबल नेपाल), कोषाध्यक्षमा दिनेश लाल श्रेष्ठ (एशियन लाइफ) तथा सदस्यहरूमा मनोजलाल कर्ण (हिमालयन लाइफ), सुन्दर पन्थी (राष्ट्रिय बीमा संस्थान) र प्रणय कुमार (एलआइसी नेपाल) रहेका छन् ।

नयाँ कार्यसमितिले आफ्नो कार्यकालमा बीमा क्षेत्रको विकास, बीमा सचेतना, कर्मचारी क्षमता अभिवृद्धि, हकहित संरक्षण, बीमा सेवाको सर्वसुलभ विस्तार तथा नीति निर्माण तहमा प्रभावकारी भूमिका निर्वाह गर्ने प्रतिबद्धता जनाएको छ ।

सभामा संघका सदस्यहरू तथा विभिन्न बीमा कम्पनीका प्रतिनिधिहरू सहभागी भएका थिए । कार्यक्रममा जीवन बीमा क्षेत्रका चुनौती, सम्भावना तथा भावी रणनीतिबारे विस्तृत छलफल गरिएको थियो ।