काठमाडौं । काठमाडौं फोटोग्राफर संघको सत्रौं वार्षिक साधारण सभा तथा नवौं अधिवेशनले आनन्द प्रभाकर घिमिरेको नेतृत्वमा नयाँ कार्यसमिति चयन गरेको छ। अधिवेशन २०८२ कार्तिक २२ गते शनिबार काठमाडौंमा सम्पन्न भएको हो।

अध्यक्षमा तीन र सचिवमा दुई जना उम्मेदवार परेकाले निर्वाचनमार्फत चयन गरिएको भए पनि अन्य पदहरूमा एकल उम्मेदवारी परेकाले निर्विरोध चयन भएका छन्। नवनिर्वाचित पदाधिकारीमा अध्यक्ष आनन्द प्रभाकर घिमिरे, उपाध्यक्ष हरी ज्ञवाली, सचिव काली प्रसाद रिमाल, सह–सचिव मिलन तमखु र कोषाध्यक्ष चन्द्र लाल राई रहेका छन्।

त्यसैगरी, कार्यसमिति सदस्यमा केशव राज भट्टराई, बासुदेव घिमिरे, विनोद ढकाल, देवराज गुरुङ, रामचन्द्र भट्ट, सुजन तिमल्सिना, रेन्जु मगर, नवराज घिमिरे, ठाकुर प्रसाद अधिकारी, रेशम अधिकारी र विनेश श्रेष्ठ चयन भएका छन्।संघको विधानअनुसार नवनिर्वाचित कार्यसमितिको कार्यकाल दुई वर्षको रहनेछ।

अध्यक्षमा चयन भएपछि आनन्द प्रभाकर घिमिरेले आफ्नो कार्यकालमा फोटोग्राफरहरूलाई गर्व गर्न लायक उपलब्धि दिलाउने प्रतिबद्धता जनाए। उनले फोटोग्राफरहरूलाई नयाँ प्रविधिमा दक्ष बनाउन तालिम सञ्चालन गर्ने, व्यावसायिक हक–अधिकारको संरक्षण गर्ने र फोटोग्राफीलाई सम्मानित पेसाका रूपमा स्थापित गर्न पहल गर्ने बताए।

उनले संघमार्फत सामूहिक बीमा कार्यक्रम सञ्चालन गर्ने, ‘केपीए वेडिङ फोटोग्राफर अवार्ड’लाई निरन्तरता दिने, नेपालमै फोटोग्राफी एक्स्पो आयोजना गर्ने र सिटिइभिटिबाट फोटोग्राफरहरूको सीप परीक्षण (स्किल टेस्ट) प्रक्रियालाई पूर्णता दिने योजना प्रस्तुत गरे।