काठमाडौं। टाटा मोटर्सले आफ्नो लोकप्रिय कुपे एसयूभी टाटा कर्भ र यसको इलेक्ट्रिक भेहिकल (ईभी) भर्सनलाई नयाँ इन्टेरियर र फिचर अपडेटसहित बजारमा ल्याएको छ।

अपडेट गरिएको कर्भमा अब अधिक आकर्षक र आरामदायी इन्टेरियर पाइने कम्पनीले जनाएको छ। नयाँ टाटा कर्भमा ‘ललितपुर ग्रे’ भनिने हल्का रंगको इन्टेरियर थिम प्रयोग गरिएको छ। यसमा बेनेके–कालिको लेदररेट अपहोल्स्ट्री र सेतो कार्बन फाइबर ड्यासबोर्ड इन्सर्ट जस्ता प्रिमियम सामग्रीहरू समावेश गरिएका छन्।

यात्राको सहजता र विलासितालाई ध्यानमा राख्दै टाटाले पछाडिका सिटमा यात्रा गर्ने यात्रुका लागि पनि नयाँ फिचरहरू थप गरेको छ। अब कर्भमा आर्मरेस्ट, सनशेड, भेन्टिलेटेड सिट र डुअल–जोन अटोमेटिक क्लाइमेट कन्ट्रोल जस्ता सुविधाहरू उपलब्ध छन्।

यसको ईभी भर्सनमा पछाडिका यात्रुका लागि फुटरेस्ट र एर्गो–विङ हेडरेस्ट पनि थप गरिएको छ, जसले लामो यात्रामा आराम बढाउने कम्पनीको दाबी छ।

इन्जिन विकल्पतर्फ कर्भ १.२ लिटर डायरेक्ट इन्जेक्सन टर्बो–पेट्रोल, १.२ लिटर टर्बो पेट्रोल, र १.५ लिटर डिजेल इन्जिनमा उपलब्ध हुनेछ। यसमा म्यानुअल र अटोमेटिक ट्रान्समिसन दुवै विकल्प पाइनेछ।

त्यस्तै, यसको इलेक्ट्रिक भेहिकल (ईभी) संस्करण भने ४५ किलोवाट–घण्टा र ५५ किलोवाट–घण्टा ब्याट्री प्याकमा उपलब्ध छ, जसले उत्कृष्ट रेंज प्रदान गर्ने कम्पनीले जनाएको छ।

टाटा मोटर्सले कर्भलाई आधुनिक डिजाइन, स्मार्ट टेक्नोलोजी र सस्तो मर्मत लागतका कारण आफ्नो सेग्मेन्टमा अत्यन्त प्रतिस्पर्धी मोडेलका रूपमा प्रस्तुत गर्ने तयारी गरेको छ।