काठमाडौं। गत भदौ २३ र २४ गतेको जेनजी आन्दोलनका क्रममा टाटा मोटर्सको थापाथलीस्थित शोरुममा व्यापक क्षति भएको थियो। आन्दोलनले शोरुमको संरचना र भित्री सुविधा दुवै प्रभावित गरेपछि कम्पनीको बिक्री तथा ग्राहक सेवा प्रणाली अस्थायी रूपमा ठप्प भएको थियो।

आधिकारिक बिक्रेता सिप्रदी ट्रेडिङ प्रा. लि. ले ७० दिनको छोटो अवधिमा शोरुमको अस्थायी पुनर्निर्माण गरेर संचालनमा ल्याएको छ। कम्पनीका महाप्रबन्धक शवन्त जंग सिजापतिले सोमबार शोरुमको पुनःसञ्चालनको अवसरमा पत्रकारहरूसँग कुरा गर्दै भने, “भदौ २३ र २४ गतेको आन्दोलनले शोरुममा ठूलो क्षति पुर्‍यायो। हामीले यसलाई पहिलाभन्दा राम्रो र सुविधा सम्पन्न बनाउने लक्ष्य राख्दै ७० दिनमा व्यवस्थित गरी पुनः संचालनमा ल्याएका छौं।”

सिजापतिले थपे, “आज हामीले हाम्रो शोरुम फिर्ता पाएका छौं। यस शोरुममार्फत ग्राहकहरूलाई सबै सेवा उपलब्ध गराउने हाम्रो प्रतिबद्धता छ। घटनाले हाम्रो मनोबल घटाएको छैन, बरु हामी अझ उत्साही भएर सेवा दिन तयार छौं।”

पुनर्निर्माणको क्रममा शोरुमको भित्री संरचना, ग्राहक प्रतीक्षालय, वाहन प्रदर्शनी क्षेत्र र सेवा काउन्टरलाई आधुनिक र सुविधासम्पन्न बनाइएको छ। साथै, डिजिटल प्रणाली र ग्राहक अनुकूल सुविधाहरू थपिएका छन्, जसले ग्राहक अनुभवलाई अझ सहज र द्रुत बनाउनेछ।

सिजापति अनुसार अब ग्राहकहरूले नयाँ वाहन खरिद, मर्मत सेवा, परीक्षण र वित्तीय परामर्श सबै सुविधा एउटै स्थानमा पाउनेछन्। कम्पनीले बिक्री र सेवा प्रक्रियामा पारदर्शिता र द्रुतता सुनिश्चित गर्ने लक्ष्य राखेको छ।

सिप्रदी ट्रेडिङका कर्मचारी र निर्माण टिमले लगातार काम गर्दै ग्राहकलाई उच्चस्तरीय सेवा दिन तयार रहेको सिजापति बताउँछन्। स्थानीय व्यवसायी र ग्राहकहरूले पनि शोरुम पुनःसञ्चालनमा स्वागत गरेका छन्। धेरैले शोरुम फिर्ता भएकोमा खुशी व्यक्त गर्दै भने, “अब सेवा र सुविधा दुवै सहज हुने भएको छ। टाटाको ग्राहक सेवा अझ मजबुत हुने देखिन्छ।”

सिजापति भन्छन्, “हामीले यस पुनर्निर्माणलाई मात्र उद्देश्य मान्दैनौं। भविष्यमा पनि शोरुम र ग्राहक सेवालाई अझ सुधार्दै टाटा मोटर्सको ब्रान्ड विश्वास कायम राख्ने हाम्रो योजना छ। ग्राहक सुविधा, सुरक्षित वातावरण र आधुनिक संरचनामा अझ ध्यान दिनेछौं।”

७० दिनको मेहनतपछि पुनः संचालनमा आएको टाटा मोटर्स थापाथली शोरुमले अब ग्राहक सेवा, बिक्री, परीक्षण र मर्मतसम्भारमा सहजता ल्याउने विश्वास कम्पनीले व्यक्त गरेको छ।