१ मंसिर, काठमाडौं — आइएमई डिजिटल सोलुसन लिमिटेड र खल्ती प्रा. लि. गाभिएर २०८२ साउन १ गतेदेखि संयुक्त रूपमा कारोबार सञ्चालन गरिरहेको आइएमई खल्ती लिमिटेडले प्रमुख कार्यकारी अधिकृत (सिइओ) को रूपमा प्रविण रेग्मीलाई नियुक्त गरेको छ।

आज बसेको सञ्चालक समितिको ११औँ बैठकले रेग्मीलाई आगामी चार वर्षका लागि नियुक्त गरेको हो। यसअघि आइएमई डिजिटल सोलुसन लिमिटेडको सिइओको जिम्मेवारी सम्हालेका रेग्मी मर्जर पश्चात आइएमई खल्ती लिमिटेडको सञ्चालक समिति सदस्यका रूपमा सक्रिय रहिसकेका छन्।

रेग्मीले फिनटेक, बैंकिङ तथा डिजिटल ट्रान्सफर्मेसन क्षेत्रमा डेढ दशकभन्दा बढी अनुभवसहित नेपालको डिजिटल भुक्तानी प्रणालीलाई आधुनिक र सक्षम बनाउन महत्वपूर्ण योगदान पुर्याउँदै आएका छन्। बढ्दो डिजिटल कारोबार र क्यासलेस अर्थतन्त्रको सवालमा रेग्मीले उल्लेख्य भूमिका निर्वाह गर्ने कम्पनीले जनाएको छ।

यस अघि कार्यकारी अधिकृतको जिम्मेवारी सम्हालेका विनय खड्का आफ्नो चार वर्षे कार्यकाल सकाएर विदा हुनुभएको छ। रेग्मी PSP संघ नेपालका संस्थापक अध्यक्ष पनि हुन् र भुक्तानी सेवा प्रदायक कम्पनीहरूबीच सहकार्य, समन्वय र नीतिगत सुधारमा उल्लेखनीय योगदान दिइसकेका छन्।

आइएमई खल्ती लिमिटेडले रेग्मीको अनुभव, दूरदृष्टि र डिजिटल भुक्तानी क्षेत्रमा नवीनता ल्याउने क्षमतालाई रणनीतिक विकासमा प्रयोग गर्दै कम्पनीले आगामी दिनमा उल्लेख्य सफलता हासिल गर्ने अपेक्षा गरेको छ।