काठमाडौं । एनआईसी एशिया बैंक लिमिटेडले बैंकको नाममा रहेका बैंकिङ सम्पत्ति, गैर–बैंकिङ सम्पत्ति तथा धितो सुरक्षणमा रहेका सम्पत्तिहरूको लिलाम बिक्रीसम्बन्धी विस्तृत जानकारी उपलब्ध गराउने उद्देश्यले अनलाइन पोर्टल सार्वजनिक गरेको छ।

बैंकले सञ्चालनमा ल्याएको उक्त पोर्टलमार्फत लिलाम बिक्रीमा रहेका सम्पत्तिको कित्ता नम्बर, क्षेत्रफल, फोटो, नक्सा तथा स्थान पहिचानका लागि गुगल म्यापसहितको विवरण हेर्न सकिने व्यवस्था गरिएको छ। लिलाम बिक्रीसम्बन्धी सूचनामा समावेश गरिएको क्युआर कोड स्क्यान गरी सो पोर्टलमा पहुँच गर्न सकिने बैंकले जनाएको छ।

खरिदमा इच्छुक व्यक्तिले आफूले किन्न चाहेको सम्पत्तिको थप जानकारीका लागि पोर्टलमा उपलब्ध म्यासेज बक्समार्फत नाम, इमेल, मोबाइल नम्बर र सम्पर्क ठेगाना उल्लेख गरी बैंकसँग सम्पर्क गर्न सक्नेछन्।

बैंकले उक्त अनलाइन पोर्टलमा लिलाम बिक्रीसम्बन्धी नयाँ सम्पत्ति तथा अन्य सूचनाहरू नियमित रूपमा अद्यावधिक गर्ने जनाएको छ। यसबाट लिलाम बिक्रीमा रुचि राख्ने ग्राहकलाई सम्पत्तिको विस्तृत जानकारी सहज रूपमा प्राप्त हुने बैंकको विश्वास छ।