स्याङ्जा । कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व (CSR) अन्तर्गत स्याङ्जा जिल्लाको पुतलीबजार नगरपालिका–४, रामकोशस्थित श्री रामकोश फूलबारी माध्यमिक विद्यालयमा अध्ययनरत गरिबीको रेखामुनि रहेका विद्यार्थीहरूलाई पोशाक तथा शैक्षिक सामग्री वितरण गरेको छ।

बैंकको शाखा कार्यालय बिरौटाको समन्वयमा आयोजित कार्यक्रममा बैंकका पोखरा क्षेत्र प्रमुख शिव कुमार ढकालले विद्यालय व्यवस्थापन समितिका अध्यक्ष ईश्वरी प्रसाद पोखरेललाई पोशाक तथा शैक्षिक सामग्री हस्तान्तरण गर्नुभएको थियो।

कार्यक्रममा बोल्दै विद्यालय व्यवस्थापन समितिका अध्यक्ष पोखरेलले बैंकको सामाजिक उत्तरदायित्व अन्तर्गत विद्यालयका विपन्न विद्यार्थीहरूलाई प्रदान गरिएको सहयोगले उनीहरूको शैक्षिक यात्रामा महत्वपूर्ण टेवा पुग्ने विश्वास व्यक्त गर्नुभयो। उहाँले निजी क्षेत्रबाट यस प्रकारको सहयोगले शिक्षा क्षेत्रमा सकारात्मक प्रभाव पार्ने बताउनुभयो।

त्यसैगरी, बैंकका पोखरा क्षेत्र प्रमुख ढकालले शिक्षा र साक्षरताको विकासमार्फत समुन्नत समाज निर्माणमा योगदान पुर्‍याउन पाएकोमा खुशी व्यक्त गर्नुभयो। उहाँले बैंकले भविष्यमा पनि सरोकारवालाहरूसँगको समन्वय तथा सहकार्यमा यस्ता सामाजिक र साक्षरता सम्बन्धी कार्यक्रमलाई निरन्तरता दिने प्रतिबद्धता जनाउनुभयो।

उक्त कार्यक्रममा बैंकका कर्मचारीहरू, विद्यालय व्यवस्थापन समितिका पदाधिकारी, विद्यालयका प्रधानाध्यापक, शिक्षक तथा विद्यार्थीहरूको उल्लेखनीय उपस्थिति रहेको थियो।

कामना सेवा विकास बैंकले शिक्षा, स्वास्थ्य, वित्तीय साक्षरता तथा सामुदायिक विकासलाई प्राथमिकतामा राख्दै देशका विभिन्न स्थानमा सामाजिक उत्तरदायित्व अन्तर्गतका कार्यक्रमहरू सञ्चालन गर्दै आएको छ।