काठमाडौं । विदेशबाट नेपालमा भित्रिने रेमिट्यान्स सेवालाई अझ सहज, सरल र विश्वासिलो बनाउने उद्देश्यका साथ माछापुच्छ्रे बैंक लिमिटेडले साइप्रसस्थित स्मार्ट पेसँग औपचारिक रेमिट्यान्स सम्झौता गरेको छ।

साइप्रस, ग्रीस, पोर्चुगल तथा अन्य युरोपेली देशहरूमा रहेका नेपालीहरूलाई नेपालमा सहज रूपमा रेमिट्यान्स पठाउने उद्देश्यले माछापुच्छ्रे बैंकले स्मार्ट पेसँग सहकार्य गरी विधिवत रूपमा रेमिट्यान्स सेवाको सुरुवात गरेको हो। उक्त सम्झौतापत्रमा स्मार्ट पेको तर्फबाट प्रमुख सञ्चालन अधिकृत स्टेफनी इसाबेल हेराक्लिओस र माछापुच्छ्रे बैंकको तर्फबाट नायब प्रमुख कार्यकारी अधिकृत प्रसिद्ध राज अर्यालले हस्ताक्षर गर्नुभएको थियो।

सम्झौतापछि युरोपेली देशहरूमा रहेका नेपालीहरूले साइप्रस, ग्रीस, पोर्चुगल तथा अन्य युरोपेली मुलुकबाट स्मार्ट पेका सबै प्रतिनिधि कार्यालय, मोबाइल एप तथा अनलाइन सेवामार्फत ‘डाइरेक्ट रेमिट’ गरी नेपाल रकम पठाउन सक्नेछन्। पठाइएको रकम माछापुच्छ्रे बैंकका १६५ वटा शाखा, शाखारहित बैंकिङ सेवा, ११ वटा एक्सटेन्सन काउन्टर तथा २० हजारभन्दा बढी रेमिट्यान्स एजेन्टमार्फत देशभर सहज रूपमा भुक्तानी लिन सकिनेछ।

साथै, स्मार्ट पे र डाइरेक्ट रेमिटमार्फत पठाइएको रकम नेपालका जुनसुकै बैंकका खातामा समेत तुरुन्त जम्मा हुने व्यवस्था मिलाइएको बैंकले जनाएको छ।

स्थापनाकालदेखि नै नवीन प्रविधिमा आधारित सेवा सुविधा ग्राहकमाझ ल्याउन प्रतिबद्ध माछापुच्छ्रे बैंक लिमिटेडले हाल पूर्वदेखि पश्चिम र हिमालदेखि तराईसम्म १६५ शाखा, ८८ शाखारहित बैंकिङ सेवा, ११ एक्सटेन्सन काउन्टर गरी जम्मा २७४ स्थानबाट सेवा प्रदान गर्दै आएको छ। बैंकले १९९ वटा एटीएममार्फत १८ लाखभन्दा बढी ग्राहकलाई आधुनिक प्रविधिसहित सम्पूर्ण बैंकिङ सेवा उपलब्ध गराइरहेको छ।