सप्तरी। प्रिमियम तथा विश्वसनीय टायल ब्रान्ड कजारियाले सप्तरी जिल्लाको भार्दहमा नयाँ, अत्याधुनिक शोरूम उद्घाटन गर्दै पूर्वी नेपालमा आफ्नो उपस्थिती विस्तार गरेको छ। सोमबार बिहान ११:३० बजे सम्पन्न उद्घाटन समारोहमार्फत त्रिशक्ति ट्रेडर्स एण्ड सप्लायर्सद्वारा सञ्चालनमा ल्याइएको उक्त शोरूम औपचारिक रूपमा सेवामा आएको हो।

उद्घाटन समारोहमा त्रिशक्ति ट्रेडर्स एण्ड सप्लायर्सका प्रोप्राइटर सर्वेश नायक, कजारियाका एरिया सेल्स प्रतिनिधि, व्यवसायिक साझेदारहरू, विशिष्ट अतिथि तथा स्थानीय शुभेच्छुकहरूको उल्लेखनीय सहभागिता रहेको थियो। श्री नायकले रिबन काटेर शोरूमको औपचारिक उद्घाटन गर्नुभएको हो।

कार्यक्रममा बोल्दै त्रिशक्ति ट्रेडर्स एण्ड सप्लायर्सका प्रतिनिधिले गुणस्तर र नवीन डिजाइनका लागि परिचित कजारियाजस्तो प्रतिष्ठित ब्रान्डसँग सहकार्य गर्न पाउँदा खुशी व्यक्त गर्नुभयो। उहाँका अनुसार यस शोरूमले भार्दह तथा आसपासका क्षेत्रका ग्राहकहरूलाई प्रिमियम टायल सहज रूपमा उपलब्ध गराउँदै दीगो र आकर्षक संरचना निर्माणमा सहयोग पुर्‍याउनेछ।

सप्तरीको भार्दहमा सुविधाजनक स्थानमा अवस्थित यस शोरूममा आवासीय तथा व्यावसायिक प्रयोजनका लागि उपयुक्त कजारियाका प्रिमियम टायलहरूको विस्तृत संग्रह प्रदर्शनीमा राखिएको छ। शोरूमले ग्राहकहरूलाई उत्पादन मात्र नभई डिजाइन छनोटको सम्पूर्ण अनुभव प्रदान गर्ने लक्ष्य लिएको जनाएको छ।

कजारिया रमेश टाइल्स लिमिटेडले नेपालकै सबैभन्दा ठूलो टायल उत्पादन कारखाना स्थापना गर्दै टायल उद्योगमा नयाँ मापदण्ड स्थापित गरिसकेको छ। अत्याधुनिक प्रविधियुक्त उत्पादन केन्द्रबाट ३,००० भन्दा बढी डिजाइनका टायल उत्पादन हुँदै आएका छन्।

हाल कजारिया नेपालभर ४५ भन्दा बढी एक्सक्लुसिभ शोरूम र १०० भन्दा बढी अधिकृत डिलरमार्फत सञ्चालनमा रहेको छ। ग्लेज्ड भिट्रिफाइड, हेभी ड्युटी टायल तथा सिरेमिक वाल टायलहरू कजारियाका प्रमुख उत्पादन हुन्, जसलाई टिकाउ, पानी प्रतिरोधी र आकर्षक डिजाइनयुक्त मानिन्छ।

भार्दहमा नयाँ शोरूमको उद्घाटनसँगै कजारियाले नेपालका विभिन्न क्षेत्रमा विश्वस्तरीय टायल सहज रूपमा उपलब्ध गराउने आफ्नो लक्ष्यतर्फ अर्को महत्वपूर्ण कदम चालेको जनाएको छ।