काठमाडौं । लक्ष्मी सन्राइज बैंक लिमिटेडको पच्चिसौँ वार्षिक साधारणसभा आज मिति २०८२ पौष १४ गते काठमाडौंमा सम्पन्न भएको छ । साधारणसभाले बैंकको चुक्ता पूँजीको १० प्रतिशत बोनस शेयर वितरण गर्ने प्रस्ताव सर्वसम्मत रूपमा पारित गरेको छ ।

पारित बोनस शेयर वितरणपश्चात् बैंकको चुक्ता पूँजी रु २६ अर्ब ७८ करोड पुगेको छ । सभाले आर्थिक वर्ष २०८१/८२ का लागि सञ्चालक समितिको वार्षिक प्रतिवेदन तथा सोही अवधिको बैंकको वित्तीय विवरणमाथि छलफल गरी स्वीकृत गरेको छ ।

त्यसैगरी, साधारणसभाले आर्थिक वर्ष २०८२/८३ का लागि लेखापरीक्षकको नियुक्ति गर्ने प्रस्ताव समेत पारित गरेको छ ।

आर्थिक वर्ष २०८१/८२ मा बैंकले रु ३७१ अर्ब निक्षेप संकलन र रु २८७ अर्ब कर्जा प्रवाह गरेको छ । सो अवधिमा बैंकको कुल वासलातको आकार रु ४४३ अर्ब पुगेको छ । बैंकले उक्त आर्थिक वर्षमा रु ४ अर्ब ६ करोड खुद मुनाफा आर्जन गर्न सफल भएको जनाएको छ ।