काठमाडौं । नाडा अटोमोबाइल्स एशोसिएशन अफ नेपालको निर्वाचन प्रक्रिया विधान, नियमावली तथा प्रचलित कानुनी व्यवस्थाअनुसार पारदर्शी र विधिसम्मत रूपमा सम्पन्न भएको छ। निर्वाचन अधिकृतको प्रत्यक्ष निगरानीमा सम्पन्न प्रक्रियाबाट नाडाको नयाँ कार्यकारिणी समिति सर्वसम्मत रूपमा निर्वाचित भएको हो।

मिति २०८२/०९/०९ मा सम्पन्न ४९औँ वार्षिक साधारण सभाको निर्णयअनुसार जिल्ला प्रशासन कार्यालय, काठमाडौंबाट प्राप्त निर्देशन तथा स्वीकृतिका आधारमा निर्वाचन प्रक्रिया अघि बढाइएको नाडाले जनाएको छ।

निर्वाचन अधिकृत कार्यालयद्वारा प्रकाशित कार्यक्रमअनुसार अध्यक्ष पदमा १, प्रदेश सदस्य पदमा ७ र साधारण सदस्य पदमा १८ उम्मेदवारी दर्ता भएका थिए। तीमध्ये साधारण सदस्यतर्फ १ उम्मेदवारी फिर्ता भएपछि अन्तिम रूपमा अध्यक्षमा १, प्रदेश सदस्यमा ७ र साधारण सदस्यमा १७ उम्मेदवारी कायम भएका थिए।

उम्मेदवार संख्या पदसंख्यासँग बराबर भएकाले प्रतिस्पर्धात्मक निर्वाचन आवश्यक नपरेको र यसै कारण पौष २५ गतेका लागि तय गरिएको मतदान कार्यक्रम रद्द गरिएको नाडाले जानकारी दिएको छ। निर्वाचनको औपचारिक परिणाम भने सोही दिन नाडा कार्यालयबाट घोषणा गरिनेछ।

नाडाले निर्वाचन प्रक्रिया निष्पक्ष, पारदर्शी र शान्तिपूर्ण रूपमा सम्पन्न भएको उल्लेख गर्दै सदस्यहरूको सहयोग, विश्वास र सक्रिय सहभागिताप्रति धन्यवाद व्यक्त गरेको छ।