काठमाडौँ। नेपालको पहिलो बैंक नेपाल बैंक लिमिटेड र काठमाडौँको चावहिलमा अवस्थित मेडिकेयर हस्पिटल लिमिटेडबीच विशेष छुटसम्बन्धी सम्झौता सम्पन्न भएको छ। उक्त सम्झौता मिति २०८२ साल पौष १८ गते सम्पन्न भएको हो।

सम्झौताअनुसार नेपाल बैंक लिमिटेडमा कार्यरत कर्मचारीहरू तथा उनीहरूका परिवार, बैंकमा पेन्सन खाता रहेका ग्राहकहरू, नेपाल बैंकका क्रेडिट कार्ड होल्डरहरू र बैंकका अवकाश प्राप्त कर्मचारीहरूले मेडिकेयर हस्पिटल लिमिटेडमा उपचार गराउँदा अस्पतालका विभिन्न उपचार सेवामा लाग्ने शुल्कको कुल बिल रकममा १० प्रतिशत छुट प्राप्त गर्ने व्यवस्था गरिएको छ।

सम्झौता पत्रमा नेपाल बैंक लिमिटेडको तर्फबाट बजारीकरण तथा अनुसन्धान डिभिजनका प्रमुख श्री निर्मल सुवेदी र मेडिकेयर हस्पिटल लिमिटेडको तर्फबाट व्यवस्थापन प्रबन्धक श्री रोशन ओझाले हस्ताक्षर गर्नुभएको हो।

यस सम्झौताबाट नेपाल बैंक लिमिटेडमा कार्यरत कर्मचारीहरू, अवकाशप्राप्त कर्मचारीहरू तथा बैंकसँग आबद्ध ग्राहकहरूले मेडिकेयर हस्पिटल लिमिटेडबाट प्रदान गरिने सहुलियतपूर्ण तथा गुणस्तरीय स्वास्थ्य सेवाबाट लाभान्वित हुने विश्वास लिइएको छ।