काठमाडौँ। सानिमा रिलायन्स लाइफ इन्स्योरेन्स लिमिटेडको नवौं वार्षिक साधारण सभा आ.व. २०८१/८२ का लागि २०८२ पौष २४ गते, बिहीबार काठमाडौँस्थित शुभ इभेन्ट्स, गोल्फुटारमा सम्पन्न भएको छ। सभाको अध्यक्षता कम्पनीका अध्यक्ष श्री रतन लाल केडियाले गर्नु भएको थियो। सभाध्यक्षले स्वागत मन्तव्य राख्दै कम्पनीको वार्षिक विवरण प्रस्तुत गर्नुभयो।

सभाले संचालक समितिको तर्फबाट प्रस्तुत वार्षिक प्रतिवेदन, लेखापरीक्षण प्रतिवेदन र वित्तीय विवरण पारित गरेको छ। साथै, शेयरधनीको लागि विद्यमान चुक्ता पूँजी रु. ५,०१,४९,२४,०५६/- को १०.१७८० प्रतिशत (रु. ५१,०४,१८,९७०/-) बराबरको नगद लाभांश (करसहित) वितरण गर्ने प्रस्ताव पारित गरिएको छ। यसैगरी लेखापरीक्षकको नियुक्ति र पारिश्रमिक निर्धारण सम्बन्धी प्रस्ताव पनि पारित भएको छ।

कम्पनीका प्रमुख कार्यकारी अधिकृत शिवनाथ पाण्डेले संस्थागत सुशासन, प्रणाली विकास, ग्राहक र अभिकर्तामैत्री कार्यक्रम, शाखा विस्तार, सूचना प्रविधिको प्रयोग, आन्तरिक नियन्त्रण प्रणाली, खर्च व्यवस्थापन र कर्मचारी मनोबल जस्ता पक्षहरूको कारण कम्पनीले बीमा बजारमा सम्मानजनक स्थान ओगट्न सफल भएको जानकारी दिनुभयो। मर्जरपछि देखिएका चुनौतीहरूलाई व्यवस्थापन गर्दै कम्पनीलाई सक्षम र सबल कम्पनीको रूपमा सञ्चालन गर्दै आएको उहाँले उल्लेख गर्नुभयो।

सभाको सफल समापनमा शेयरधनी, अतिथी, नियामक निकायहरू, संस्थागत साझेदार, अभिकर्ता, बीमित तथा सञ्चारकर्मी र कर्मचारीप्रति धन्यवाद ज्ञापन गरिएको छ।