काठमाडौँ। शैक्षिक परामर्श व्यवसायीहरुको सबैभन्दा ठूलो छाता संगठन नेपाल शैक्षिक परामर्श संघ (इक्यान)मा यतिखेर चुनावी सरगर्मी छाएको छ । यही पुस २८ गते हुन गइरहेको निर्वाचनमा परामर्श व्यवसायीहरु दुई कित्तामा विभाजित भएका छन् । वर्तमान प्रथम उपाध्यक्ष लक्ष्मण पौडेल ‘एन्ड्रयु’ र वर्तमान महासचिव दिपकराज भुसालले अध्यक्षमा उम्मेदवारी दिएका छन् । उनीहरु दुवैजना प्यानल नै बनाएर चुनावी मैदानमा उत्रिसकेका छन् ।

सर्वसम्मत नेतृत्व चयनको प्रयास असफल भएपछि इक्यान संस्थापन पक्षले महासचिव भुसाललाई अध्यक्षको उम्मेदवारको रुपमा अगाडी बढायो । भुसाल इक्यान कार्यसमिति सदस्य, प्रथम सचिव हुँदै महासचिव भएका व्यक्ति हुन् । उनले दुई कार्यकाल महासचिवको भूमिका निर्वाह गरिसकेका छन् । लामो समयदेखिको अनुभव, योगदान र क्रियाशिलताको मूल्यांकन गर्दै संस्थापन पक्षले इक्यान नेतृत्वको लागि भुसाल सक्षम रहेको निष्कर्ष निकालेको छ ।

संस्थापन पक्षले विश्वास गरेका भुसालले पनि अध्यक्षको उम्मेदवारी सहित २६ बुँदे घोषणापत्र समेत सार्वजनिक गरिसकेका छन् । त्यतिमात्र होइन उनले आफुलाई योग्य, सक्षम र अनुभवी उम्मेदवारको रुपमा पनि प्रस्तुत गरेका छन् ।

केही व्यवसायीहरुले लामो समयदेखिको योगदान र अनुभवलाई अवमूल्यन गर्दै केही होइन भनेपछि भुसालले इक्यानको जुन उचाइ छ, त्यसलाई सुरक्षित राख्दै निरन्तर उडान भर्न सक्ने अनुभवी क्याप्टेन (नेतृत्व) चाहिने प्रतिक्रिया दिएका छन् ।

‘संकटको समयमा जहाजको ककपिट प्रशिक्षार्थीको हातमा सुम्पिइँदैन, आँधीबेहरी झेलिसकेको अनुभवी क्याप्टेनलाई नै विश्वास गरिन्छ,’ भुसालले भने ।

अहिले इक्यानलाई कुनै प्रयोगशाला बनाउन नभई परिणाम दिने नेतृत्व चाहिएको उनको भनाई छ । इक्यानको नेतृत्व गर्न आफ्नो अनुभव किन अनिवार्य छ ? भन्ने कुरालाई भुसालले ठोस कारण दर्साउँदै पाँच बुँदामा व्याख्या गरेका छन् ।

उनले आफ्नो अनुभवलाई पाँच बुँदामा यसरी व्याख्या गरेका छन्ः
पहिलोः संस्थागत गरिमाको विस्तार– इक्यान आजको दिनमा एउटा प्रतिष्ठित ब्राण्ड बनिसकेको छ । एउटा घरको जग बसाल्न सजिलो हुन्छ, तर त्यसलाई मेगा स्ट्रक्चर मा रुपान्तरण गर्न इन्जिनियरिङ र अनुभव दुवै चाहिन्छ । मेरो अनुभवले यो संस्थालाई केवल नेपालको होइन, दक्षिण एशियाकै उत्कृष्ट प्रभावशाली संस्था बनाउने स्पष्ट रोडम्याप बोकेको छ ।

दोस्रोः सरोकारवालाहरूसँगको मजबुत सम्बन्ध– शैक्षिक परामर्श व्यवसाय अन्तर्राष्ट्रिय कलेज, विश्वविदालय, बैंकहरु र नियामक निकायहरूसँगको सम्बन्धमा टिकेको छ। मेरो १२ बर्षको अनुभवले ती सरोकारवालासँग जुन ‘व्यक्तिगत र व्यवसायीक’ सम्बन्ध बनाएको छ, त्यसले हाम्रा सदस्यहरूको प्रतिष्ठालाई सधैँ उच्च राख्नेछ । सम्बन्धहरू रातारात बन्दैनन्, यिनलाई विश्वास र नेटवर्किङले तिखारेको हुन्छ ।

तेस्रोः उच्चस्तरीय नीतिगत पैरवी– शिक्षा मन्त्रालय, प्रदेश सरकार र विभिन्न राजदूतावासहरूसँग टेबुलमा बसेर हाम्रो हकहितका लागि छलफल गर्न सक्ने प्रधिकार अनुभवले मात्र दिन्छ । म दर्ता प्रकिया, भिसा पोलीसी, एनओसीको झन्झट र करका जटिलताहरू हटाउन सिधै नीतिगत सम्वाद गर्न सक्षम छु, किनकि मलाई कर्मचारीतन्त्रको भाषा र कूटनीतिको मर्यादा दुवै थाहा छ ।

चौथोः संकट व्यवस्थापनको अनुभव– विगतका ठूला संकटहरूमा इक्यानलाई कसरी जोगाउने भन्ने कुरा मैले नजिकबाट सम्हालेको छु । नयाँ नेतृत्वलाई समस्या बुझ्न नै समय लाग्छ, तर म समस्या आउनु अगावै त्यसको अग्रिम समाधन निकाल्न सक्छु । मेरो अनुभवले सदस्यहरूको लगानी र भविष्यलाई सुरक्षाको ग्यारेन्टी दिन्छ ।

पाँचौः लिगेसी र पुस्तान्तरणको संयोजन– मेरो अनुभव ‘पुरानो विचार, होइन, बरु परम्परागत मूल्य मान्यता र आधुनिक प्रविधिको संगम हो । म युवा र व्यावसायिक उद्यमीहरूलाई साथमा लिएर अनुभव र उर्जाको यस्तो बलियो टिम बनाउँदैछु, जसले इक्यानलाई एउटा आईएसओ मानक आधुनिक र प्रविधिमैत्री संस्थामा रुपान्तरण गर्नेछ ।

आफुले हासिल गरेको अनुभव केवल बिताइएका वर्षहरू मात्र नभएर ती वर्षहरूमा कमाइएको भरोसा र सम्बन्धलाई बलियो नेटवर्किङको रुपमा हेर्नुपर्ने भुसालको भनाई छ । इक्यानलाई ‘प्रयोगशाला’ नबनाउन अनुभवी र परीक्षित नेतृत्वको हातमा सुम्पिएर सुरक्षित भविष्य रोज्न पनि उनले आग्रह गरेका छन्