काठमाडौं । वाटर इनर्जी सोलुसन लिमिटेडले सर्वसाधारणका लागि प्राथमिक शेयर (आईपीओ) जारी गर्ने भएको जनाएको छ। यसका लागि कम्पनीले हिमालयन क्यापिटल लिमिटेडलाई निष्काशन तथा बिक्री प्रबन्धक नियुक्त गरेको छ।

यस सम्बन्धमा वाटर इनर्जी सोलुसन लिमिटेड र हिमालयन क्यापिटल लिमिटेडबीच बिहीबार औपचारिक सम्झौता सम्पन्न भएको कम्पनीले बताएको छ। सम्झौतापश्चात अब कम्पनीले आवश्यक प्रक्रियासहित नेपाल धितोपत्र बोर्ड (SEBON) मा आईपीओ प्रस्ताव पेस गर्नेछ।

वाटर इनर्जी सोलुसन लिमिटेड हाल इलाम जिल्लामा ८.३ मेगावाट क्षमताको अप्पर देउमाइ खोला जलविद्युत आयोजना निर्माण गरिरहेको छ। आयोजना निर्माणप्रगतिसँगै कम्पनीले सर्वसाधारण निरन्तर साझेदार बनाउन आईपीओ जारी गर्न लागिएको जनाएको छ।

कम्पनीका अनुसार परियोजना सम्पन्न भएपछि राष्ट्रिय विद्युत् प्रणालीमा थप विद्युत् जोडिनुका साथै स्थानीयस्तरमा रोजगारी र आर्थिक गतिविधिमा बिस्तार हुने विश्वास लिइएको छ।