काठमाडौं । नेपाल बैंक लिमिटेड र ॐ हस्पिटल एण्ड रिसर्च सेन्टर प्रा. लि. बीच चिकित्सा सेवामा विशेष छुट प्रदान गर्ने सम्झौता भएको छ।

मिति २०८२ पौष २३ गते सम्पन्न सम्झौता अनुसार नेपाल बैंकमा कार्यरत कर्मचारी, उनीहरूको परिवार तथा बैंकमा खाता भएका ग्राहकहरूले काठमाडौं चावहिलस्थित ॐ हस्पिटल एण्ड रिसर्च सेन्टरमा उपचार गराउँदा विशेष छुट पाउनेछन्।

सम्झौताअनुसार अस्पतालले प्रदान गर्ने विविध स्वास्थ्य सेवा तथा उपचार शुल्कमा बिल रकमको ५ देखि १५ प्रतिशतसम्म छुट उपलब्ध गराइनेछ।

उक्त सम्झौतामा नेपाल बैंकतर्फबाट प्रमुख वित्त अधिकृत दीपेन्द्र राज काफ्ले र ॐ हस्पिटल एण्ड रिसर्च सेन्टरतर्फबाट प्रमुख कार्यकारी अधिकृत यम बहादुर महतले हस्ताक्षर गरेका छन्।

सम्झौताले नेपाल बैंकका कर्मचारी, तिनका परिवार तथा ग्राहकहरूलाई सहुलियतपूर्ण दरमा गुणस्तरीय स्वास्थ्य सेवा लिन सहज बनाउने दुवै संस्थाले विश्वास व्यक्त गरेका छन्।