काठमाडौँ। एनसेल आजदेखि जेन–जी पुस्तालाई लक्षित गर्दै नयाँ स्टार्टअप प्याक ‘युवा सिम’ संचालनमा ल्याएको छ। सन् १९९७ पछि जन्मिएका नेपाली नागरिकलाई लक्षित यो प्याक विद्यार्थी तथा युवा वर्गलाई सुलभ दरमा निरन्तर कनेक्टिभिटी प्रदान गर्ने उद्देश्यले ल्याइएको कम्पनीले जनाएको छ।

रु. २९९ मा उपलब्ध रहेको युवा सिममा एनसेल–टु–एनसेल अनलिमिटेड कल, ५ जीबी डेटा, डिजिटल वालेट इसेवा र खल्ती तथा अनलाइन सिकाइ प्लेटफर्म ‘मेरो स्कुल’ को निःशुल्क पहुँच पनि समावेश छ। प्याकको मान्यता अवधि २८ दिन रहेको छ।

एनसेलले युवालाई सामाजिक सञ्जालमा सक्रिय बनाउन लक्ष्य गर्दै फेसबुक, टिकटक र इन्स्टाग्रामका लागि १ दिन १ जीबी डेटा केवल रु. १९ मा उपलब्ध गराएको छ।
त्यसैगरी अन्य स्थानीय नेटवर्कमा कल दर प्रति मिनेट रु. १ कायम गरिएको छ।

कम्पनीका चीफ कन्सुमर बिजनेस अफिसर उपाङ्ग दत्तका अनुसार युवा सिमले युवालाई हरेक समय कनेक्ट रहन सुविधा दिने र डिजिटल अवसरसँग जोड्ने विश्वास लिएको छ। “यो प्याकले विद्यार्थीको डिजिटल जीवनशैली सजिलो बनाउनेछ,” दत्तले भने।

सिम खरिद गर्न नागरिकता वा लाइसेन्ससँगै विद्यार्थी परिचयपत्र अनिवार्य रहनेछ। यी कागजात नभए अभिभावकको सरकारी परिचयपत्र र विद्यार्थी परिचयपत्र बुझाएर पनि सिम लिन सकिने एनसेलले जनाएको छ।

सेवा निरन्तर प्रयोग गर्न २८ दिनपछि पुनः सोही शुल्कमा प्याक रिन्यू गर्न सकिनेछ। ग्राहकहरूले युवा सिम *एनसेल एपबाट वा 123# डायल गरेर खरिद गर्न सक्छन्।