काठमाडौं, ३० पुस । नेपाल इन्भेष्टमेण्ट मेगा बैंक लिमिटेडले आफ्नो ३९औँ वार्षिक साधारण सभा सफलतापूर्वक सम्पन्न गरेको छ ।

काठमाडौंको एलिस रिसेप्सनमा बुधबार बैंकका अध्यक्ष पृथ्वीबहादुर पाँडेको अध्यक्षतामा सम्पन्न सभामा शेयरधनीहरूको उल्लेखनीय सहभागिता रहेको थियो । सभामा बैंकको गत आर्थिक वर्षको वार्षिक प्रतिवेदन, लेखापरीक्षकको प्रतिवेदन तथा वित्तीय विवरण प्रस्तुत गरी छलफल गरिएको थियो ।

बैंकले आर्थिक वर्ष २०८१/८२ मा ४ अर्ब ३३ करोड रुपैयाँ खुद मुनाफा आर्जन गर्न सफल भएको जानकारी दिएको छ । यस अवधिमा बैंकको कुल निक्षेप ६९ अर्ब ४८ करोड रुपैयाँले वृद्धि भई ४ खर्ब ७६ अर्ब रुपैयाँ पुगेको छ । कर्जा प्रवाहतर्फ २० अर्ब ८४ करोड रुपैयाँको विस्तारसँगै खुद कर्जा तथा सापटी रकम ३ खर्ब ३९ अर्ब रुपैयाँ कायम भएको छ ।

त्यसैगरी, बैंकले आफ्नो लगानी ३५ अर्ब ८७ करोड रुपैयाँले बढाउँदै १ खर्ब ४२ अर्ब रुपैयाँ पुर्‍याएको छ । बैंकको चुक्ता पूँजी ३४ अर्ब १३ करोड रुपैयाँ रहेको छ भने कुल शेयरधनी कोष ६४ अर्ब ९८ करोड रुपैयाँ पुगेको छ ।

हाल बैंकले देशभर २७१ शाखा, २५९ एटीएम, ६५ एक्सटेन्सन काउन्टर तथा ६० शाखारहित बैंकिङ सेवा मार्फत अत्याधुनिक बैंकिङ सेवा प्रदान गर्दै आएको छ ।