काठमाडौं। हिमालयन एभरेष्ट इन्स्योरेन्स लिमिटेडले गत भदौ २३ गते जेनजि आन्दोलनका क्रममा क्षतिग्रस्त भएको सर्वोच्च तथा विशेष अदालत समन्वय सुरक्षा प्रहरी इकाईको पुनर्निर्माण कार्य सम्पन्न गरी औपचारिक रूपमा हस्तान्तरण गरेको छ।

पुनर्निर्माणमार्फत प्रभावित भवन पुनः सञ्चालनयोग्य बन्दै सार्वजनिक संरचना संरक्षण र सुरक्षा निकायको कार्यसम्पादन सहज बन्नेमा कम्पनीले विश्वास व्यक्त गरेको छ। पुनर्निर्माण सम्पन्न भएसँगै उक्त प्रहरी इकाईले नवनिर्मित संरचनाबाट नियमित सेवा सञ्चालन थालेको छ।

हस्तान्तरण समारोहमा सहभागी काठमाडौं उपत्यका प्रहरी कार्यालयका अतिरिक्त महानिरीक्षक (एआईजी) ईश्वर कार्कीले कार्यालय पुनस्र्थापना गरी सेवा सुचारु बनाउन सहयोग पुर्‍याएबापत कम्पनीप्रति धन्यवाद व्यक्त गरे। उनले सर्वोच्च अदालत परिसरमा सेवा लिन आउने सर्वसाधारण र सुरक्षा व्यवस्थामा पुनर्निर्माणले ठूलो राहत पुर्‍याएको बताए।

सोही अवसरमा हिमालयन एभरेष्ट इन्स्योरेन्स लिमिटेडकी प्रमुख कार्यकारी अधिकृत अञ्जु श्रेष्ठले कम्पनीले भविष्यमा पनि सामाजिक उत्तरदायित्व (CSR) अन्तर्गत समाज उपयोगी कार्यहरू निरन्तर प्राथमिकतासाथ अघि बढाउने प्रतिबद्धता व्यक्त गरिन्।

भवन पुनर्निर्माणसँगै कम्पनीले दुई थान कम्प्युटर, दुई थान दराज, एक थान प्रिन्टर, १२ थान कुर्सी र ९ थान टेबुल समेत उक्त प्रहरी इकाईलाई प्रदान गरेको छ।