विराटनगर। सूर्यज्योति लाइफ इन्स्योरेन्स कम्पनीले आफ्नो १८ औँ वार्षिक साधारणसभा आज पुस ३० गते विराटनगरस्थित होटल हैरिसन प्यालेसमा सम्पन्न गरेको छ।

सभाको अध्यक्षता कम्पनीका सञ्चालक समितिका अध्यक्ष केशव प्रसाद भट्टराईले गरेका थिए। कार्यक्रममा कम्पनीका सञ्चालक, प्रमुख कार्यकारी अधिकृत, उपप्रमुख कार्यकारी अधिकृत, व्यवस्थापनका पदाधिकारी, शेयरधनी तथा अन्य अतिथि उपस्थित थिए।

सभाले आर्थिक वर्ष २०८१/८२ को वार्षिक प्रतिवेदन, लेखापरीक्षकको प्रतिवेदन, वासलात, नाफा–नोक्सान हिसाब, नगद प्रवाह विवरण र सम्बद्ध अनुसूची छलफल गरी सर्वसम्मतिले पारित गरेको छ। सोही अवसरमा १३ प्रतिशत नगद लाभांश (करसहित) पनि पारित गरिएको छ।

यस्तै, सभाले कम्पनीले संस्थागत सामाजिक उत्तरदायित्व (CSR) अन्तर्गत आर्थिक वर्ष २०८१/८२ मा गरेका खर्चलाई अनुमोदन गरेको छ।

अध्यक्ष भट्टराईले सभामा कम्पनीको आर्थिक प्रगति, दीर्घकालीन योजना र डिजिटल रुपान्तरणमा ध्यान केन्द्रित गर्ने प्रतिबद्धता व्यक्त गर्दै निरन्तर प्रगतिको श्रेय शेयरधनीको विश्वास, ग्राहकको साथ, अभिकर्ताको मेहनत र कर्मचारीको लगन भएको बताए।

सभामा शेयरधनीहरूले कम्पनीप्रति आफ्नो विश्वास र आगामी दिनका अपेक्षाहरू राखेका थिए। सभामा प्रस्तुत सबै प्रस्ताव सर्वसम्मतिले पारित भएका छन्। कम्पनीले सेवा गुणस्तर सुधार्दै ग्राहकको जीवनमा सुरक्षा प्रत्याभूति दिने प्रतिबद्धता पनि व्यक्त गरेको छ।

सूर्यज्योति लाइफ, नेपालकै पहिलो ISO 9001–2015 प्रमाणित कम्पनी, हाल चुक्तापुँजी ५०१ करोड, जीवन बीमाकोष ४३८३ करोड, लगानी ४८४५ करोड, नेटवर्थ ६७४ करोड, १ लाख ६ हजार अभिकर्ता, ३५ लाख ८७ हजार बीमालेख र १७६ शाखा सञ्जाल मार्फत सेवा प्रदान गर्दै आएको छ। साथै, कम्पनीले नेपालमै सर्वाधिक ३५ घातक रोगहरुविरुद्ध ५० लाख रुपैयाँसम्मको आर्थिक सुरक्षा पनि प्रदान गरिरहेको छ।