काठमाडौं। नेपालमा सञ्चालित जीवन बीमा कम्पनीहरुले चालु आर्थिक वर्षको पुष महिनामा १७ अर्ब ४७ करोड रुपैयाँ बराबरको बीमा शुल्क आर्जन गरेका छन्। नेपाल बीमा प्राधिकरणले सार्वजनिक गरेको तथ्यांक अनुसार, देशभर सञ्चालनमा रहेका १४ वटा जीवन बीमा कम्पनीहरुले उक्त रकम आर्जन गरेका हुन्।

गत आर्थिक वर्षको तुलनामा जीवन बीमा कम्पनीहरुको व्यवसाय १७.१० प्रतिशतले बढेको छ। कम्पनीहरुले गत वर्ष सोही अवधिमा १४ अर्ब ९२ करोड २० लाख रुपैयाँ बीमा शुल्क आर्जन गरेका थिए।

कुल बीमा शुल्कको आधारमा नेपाल लाइफ इन्स्योरेन्स र नेशनल लाइफ इन्स्योरेन्स अग्रस्थानमा छन्। नेपाल लाइफ इन्स्योरेन्सले चार अर्ब १३ करोड ८९ लाख रुपैयाँ बीमा शुल्क आर्जन गर्दै सबैभन्दा अगाडि रहेको छ। यसले गत वर्षको तुलनामा १२.०८ प्रतिशत वृद्धिदर देखाएको छ।

दोस्रो स्थानको नेशनल लाइफ इन्स्योरेन्सले २९.७० प्रतिशत वृद्धि गर्दै दुई अर्ब १० करोड २८ लाख रुपैयाँ र एलआइसी नेपालले १३.८० प्रतिशत वृद्धि गर्दै दुई अर्ब ४ करोड ४२ लाख रुपैयाँ बीमा शुल्क आर्जन गरेको छ।

त्यस्तै, हिमालयन लाइफ इन्स्योरेन्स १०.२८ प्रतिशत वृद्धि हुँदै एक अर्ब ६९ करोड ७६ लाख, सूर्यज्योति लाइफ इन्स्योरेन्स ११.०८ प्रतिशत वृद्धि हुँदै एक अर्ब १८ करोड ७३ लाख, एशियन लाइफ इन्स्योरेन्स ३.५४ प्रतिशत वृद्धि हुँदै ८८ करोड ८५ लाख, सानिमा रिलायन्स लाइफ इन्स्योरेन्स २९.५६ प्रतिशत वृद्धि हुँदै ८३ करोड २९ लाख, र सिटिजन लाइफ इन्स्योरेन्स ११.०५ प्रतिशत वृद्धि हुँदै ८० करोड ८६ लाख रुपैयाँ बीमा शुल्क आर्जन गरेका छन्।

सरकारी स्वामित्वको राष्ट्रिय जीवन बीमा कम्पनीले सबैभन्दा उच्च ४६.४८ प्रतिशत वृद्धिदर देखाउँदै ७५ करोड ६४ लाख रुपैयाँ आर्जन गरेको छ।
यसैगरी, आइएमई लाइफ इन्स्योरेन्स ३४ प्रतिशत वृद्धि हुँदै ७३ करोड ४ लाख, रिलायबल नेपाल लाइफ इन्स्योरेन्स ३८.६२ प्रतिशत वृद्धि हुँदै ६४ करोड २४ लाख, मेट नेपाल १२.६६ प्रतिशत वृद्धि हुँदै ६० करोड ४४ लाख, प्रभु महालक्ष्मी लाइफ इन्स्योरेन्स १८.६२ प्रतिशत वृद्धि हुँदै ५७ करोड ५० लाख, र सन नेपाल लाइफ इन्स्योरेन्स ८.५४ प्रतिशत वृद्धि हुँदै ४६ करोड ४० लाख रुपैयाँ बीमा शुल्क आर्जन गरेका छन्।