काठमाडौं। भारतका लागि पोल्याण्ड गणतन्त्रका कार्यवाहक राजदूत, महामहिम डा. पियोटर आन्तोनी श्विताल्स्कीले काठमाडौंस्थित हायात सेन्ट्रिक सोल्टीमोड होटलमा आयोजित औपचारिक समारोहमा मानार्थ वाणिज्यदूत जनरल श्री लोकमान्य गोल्छालाई पोल्याण्डको ‘अर्डर अफ मेरिट’ को अफिसर क्रस प्रदान गर्नुभएको छ।

नेपालमा पोल्याण्डको स्थायी दूतावास नभएकाले नेपालका लागि कूटनीतिक प्रतिनिधित्व भारतको नयाँ दिल्लीस्थित पोल्याण्ड दूतावासमार्फत हुँदै आएको छ। उक्त दूतावासले नेपाल–पोल्याण्डबीचको सहकार्य प्रवर्द्धन गर्ने, पोलिश नागरिकलाई आवश्यक सहयोग प्रदान गर्ने, र जनस्तरको सम्बन्ध सुदृढ पार्ने कार्य गर्दै आएको छ।

यो सम्मान पोल्याण्डले विदेशी नागरिकलाई प्रदान गर्ने उच्चतम नागरिक सम्मानहरूमध्ये एक हो। समारोहमा विशिष्ट अतिथि र कूटनीतिक समुदायका सदस्यहरूको उपस्थिति थियो। पोल्याण्डले यसअघि सन् २०१५ मा नेपालमा आएको भूकम्पको समयमा पुर्याएको योगदानका लागि श्री गोल्छालाई नाइट्स क्रस अफ द अर्डर अफ मेरिट प्रदान गरिसकेको थियो।

यसपटक प्रदान गरिएको अफिसर क्रस नेपाल–पोल्याण्ड सम्बन्धको सुदृढीकरण, कोभिड–१९ महामारीको कठिन समयमा देखाइएको नेतृत्व, र नेपालमा रहेका पोलिश नागरिकप्रति निरन्तर सहयोगको मूल्याङ्कन स्वरूप प्रदान गरिएको हो।

समारोहमा डा. श्विताल्स्कीले श्री गोल्छाको दीर्घकालीन प्रतिबद्धता र दुई देशबीचको मैत्रीपूर्ण सम्बन्ध प्रवर्द्धनमा पुर्याएको योगदानको उच्च प्रशंसा गर्नुभयो। सम्मान ग्रहण गर्दै श्री गोल्छाले यसलाई नेपाल–पोल्याण्ड बीचको साझा मूल्य, आपसी सम्मान र मित्रताको प्रतीकको रूपमा व्याख्या गर्नुभयो।