काठमाडौं । यसोदा फुड्स प्रा.लि.द्वारा सञ्चालित रिटेल आउटलेट ‘करेन्ट मार्ट’ को दोस्रो शाखा काठमाडौंमा सञ्चालनमा आएको छ । काठमाडौंको नयाँ बानेश्वरस्थित कात्यानी चोकमा माघ १८ गतेदेखि उक्त मार्ट औपचारिक रूपमा सञ्चालनमा ल्याइएको हो ।

भैरहवामा सञ्चालनमा रहेको पहिलो आउटलेटको सफलता र उपभोक्ताहरूको बढ्दो मागलाई मध्यनजर गर्दै कम्पनीले राजधानी काठमाडौंमा नयाँ शाखा विस्तार गरेको जनाएको छ ।

नयाँ बानेश्वरस्थित कात्यानी चोकमा अवस्थित करेन्ट मार्टको उद्घाटन यसोदा फुड्सका डाइरेक्टर मधुसुदन घिमिरे र नेसनल सेल्स म्यानेजर युगराज पाण्डेले संयुक्त रूपमा रिबन काटेर गरेका थिए । उद्घाटन कार्यक्रममा डाइरेक्टर घिमिरेले करेन्ट मार्ट र यसोदा फुड्सका उत्पादनबारे सञ्चारकर्मीलाई जानकारी दिएका थिए ।

उद्घाटन समारोहमा कम्पनीका एरिया सेल्स म्यानेजरहरू सोनी पुडासैनी, विमला खाति र सपना भुसालसहित ग्राहक तथा शुभेच्छुकहरूको उल्लेख्य उपस्थिति रहेको थियो ।

करेन्ट मार्टमार्फत उपभोक्ताहरूले यसोदा फुड्सद्वारा उत्पादित सम्पूर्ण रेन्जका उत्पादनहरू एकै छानामुनि प्राप्त गर्न सक्नेछन् । मार्टमा करेन्ट ब्रान्डका लोकप्रिय नुडल्स (चाउचाउ), विभिन्न प्रकारका स्न्याक्स, चिज बल्स, स्टिक्स, पोट्याटो क्र्याकर्स, करेन्ट गोल्ड मसाला र सिटिसी चिया, साथै जिरा पाउडर, धनिया पाउडर, रातो खुर्सानी पाउडरलगायत विभिन्न मसला उपलब्ध छन् ।

उद्घाटनका क्रममा बोल्दै यसोदा फुड्सका चेयरम्यान चुन्न प्रसाद पौडेलले भैरहवाका उपभोक्ताहरूले करेन्ट मार्टप्रति देखाएको विश्वास र माया नै काठमाडौंमा सेवा विस्तारको प्रेरणा बनेको बताए । उनले अब कात्यानी चोकबाट उपभोक्ताहरूले ताजा र गुणस्तरीय उत्पादन सहज रूपमा खरिद गर्न सक्ने उल्लेख गरे ।

यसअघि कम्पनीले काठमाडौंको अनामनगर र शंखमूलमा ‘करेन्ट पोइन्ट’ सञ्चालन गर्दै आएको छ । नयाँ करेन्ट मार्टले प्याकेज्ड फुड खरिद गर्न चाहने उपभोक्ताहरूलाई थप सुविधा प्रदान गर्ने कम्पनीको विश्वास छ ।

सन् २०१७ मा स्थापना भएको यसोदा फुड्स प्रा.लि. नेपालका अग्रणी खाद्य तथा पेय पदार्थ उत्पादक कम्पनीहरूमध्ये एक हो । ‘करेन्ट’ ब्रान्डअन्तर्गत विभिन्न प्रकारका पिरो तथा स्वादिष्ट चाउचाउ उत्पादन गर्दै आएको कम्पनीले छोटो समयमै नेपाली उपभोक्तामाझ लोकप्रियता हासिल गरेको छ । हाल कम्पनीका उत्पादनहरू नेपालभरि वितरण हुनुका साथै २२ भन्दा बढी देशहरूमा निर्यात हुँदै आएका छन् ।