काठमाडौं । गरिमा म्युचूअल फण्ड अन्तर्गत विकास बैंकबाट प्रवर्धित पहिलो खुलामुखी योजना “गरिमा सुवर्ण योजना” सार्वजनिक रुपमा निष्काशन गर्न नेपाल धितोपत्र बोर्डले स्वीकृति दिएको छ।

गरिमा विकास बैंक लिमिटेड कोष प्रवर्धक तथा गरिमा क्यापिटल लिमिटेड योजना व्यवस्थापक रहेको उक्त योजना रु. १ अर्ब बराबरको रहेको छ। नेपाल धितोपत्र बोर्डबाट २०८२ साल माघ २१ गते स्वीकृति प्राप्त भएसँगै यो योजना छिट्टै सार्वजनिक निष्काशनमा आउने भएको हो।

खुलामुखी प्रकृतिको यस योजनामा प्रथम चरणमा बीज पूँजीसहित ५ करोड इकाई निष्काशन गरिनेछ। प्रति इकाई मूल्य रु. १० कायम गरिएको छ भने न्यूनतम १०० इकाईदेखि अधिकतम ५० लाख इकाईसम्म आवेदन दिन सकिने व्यवस्था रहेको छ। कुल निष्काशनको न्यूनतम ५० प्रतिशत अर्थात २ करोड ५० लाख इकाई बिक्री हुनुपर्ने व्यवस्था गरिएको छ।

योजना खुलामुखी भएकाले यसको कुनै निश्चित अवधि नरहनेछ। इकाईहरु नेपाल स्टक एक्सचेन्जमा सूचिकरण नहुने भए पनि योजना व्यवस्थापकद्वारा सञ्चालन गरिने अनलाइन प्रणालीमार्फत खरिद तथा बिक्री गर्न सकिनेछ।

गरिमा क्यापिटल लिमिटेड नेपाल धितोपत्र बोर्डबाट अनुमतिपत्र प्राप्त मर्चेन्ट बैंकर हो। कम्पनीले गरिमा विकास बैंकका सम्पूर्ण शाखामार्फत आफ्ना सेवाहरु ग्राहकसम्म पुर्‍याउँदै आएको छ।