काठमाडौं । एन आई सी एशिया बैंकले आफ्नो संस्थागत सामाजिक उत्तरदायित्व अन्तर्गत सातै प्रदेशका ७५ जना जेहेन्दार विद्यार्थीलाई छात्रवृत्ति प्रदान गरेको छ।

बैंकले काठमाडौं उपत्यका बाहिरका सरकारी तथा सामुदायिक विद्यालयमा कक्षा ६ देखि १० सम्म अध्ययनरत गरिब, विपन्न, पिछडिएका वर्ग तथा अपाङ्गता भएका विद्यार्थीबाट आवेदन आह्वान गरेको थियो। प्राप्त आवेदनमध्ये छनौट गरी योग्य विद्यार्थीलाई छात्रवृत्ति प्रदान गरिएको बैंकले जनाएको छ।

बैंकका अनुसार विगत वर्षहरूमा पनि सरकारी तथा सामुदायिक विद्यालयमा अध्ययनरत जेहेन्दार विद्यार्थीलाई छात्रवृत्ति प्रदान गर्दै आइएको छ। साथै सातै प्रदेशका विभिन्न विद्यालयमा पुस्तकालय भवन निर्माण गरी पुस्तकालय स्थापना समेत गरिएको बैंकले जनाएको छ।

यस छात्रवृत्तिले विद्यार्थीहरूको शैक्षिक गुणस्तर वृद्धि हुनुका साथै व्यक्तित्व विकास र अध्ययनलाई निरन्तरता दिन सहयोग पुग्ने विश्वास बैंकले व्यक्त गरेको छ।