काठमाडौं। आईएमई लाइफ इन्स्योरेन्स कम्पनी लिमिटेडले अन्तर्राष्ट्रिय स्तरको प्रतिष्ठित “इमर्जिङ एसिया अवार्ड” अन्तर्गत तीन विधामा अवार्ड जित्न सफल भएको छ। इन्डियन चेम्बर अफ कमर्सद्वारा थाइल्यान्डको बैंककमा आयोजित छैटौं संस्करणको उक्त अवार्ड कार्यक्रममा कम्पनी सम्मानित भएको हो।

कम्पनीले उत्कृष्ट ग्राहक–मुखी सेवा (The Best Customer Oriented Company), बीमा कभरेजमा उत्कृष्ट रणनीति (Best Strategies for Insurance Coverage) मा संयुक्त अवार्ड तथा बीमा नेतृत्वमा महिला (Women in Insurance Leadership) विधामा अवार्ड प्राप्त गरेको जनाएको छ। यी अवार्ड स्वतन्त्र तथा विशिष्ट अन्तर्राष्ट्रिय निर्णायक मण्डलद्वारा प्रदान गरिएको हो।

उक्त अवार्डले आईएमई लाइफको ग्राहक–केन्द्रित सेवा, नवप्रवर्तनकारी रणनीति तथा सहभागितामूलक नेतृत्वको कदर गरेको कम्पनीले जनाएको छ। साथै, देशभित्र बीमा सचेतना अभिवृद्धि गर्ने, आधुनिक प्रविधिमैत्री सेवा प्रदान गर्ने तथा बीमा क्षेत्रमा महिलाको नेतृत्व विकास गर्ने कम्पनीको लक्ष्यलाई यस उपलब्धिले थप ऊर्जा प्रदान गर्ने विश्वास गरिएको छ।

कार्यक्रममा नेपालबाट प्रतिनिधित्व गर्दै आईएमई लाइफका प्रमुख कार्यकारी अधिकृत पवन कुमार खड्काले प्यानल छलफलमा सहभागिता जनाएका थिए। उनले डिजिटल प्रविधि र कृत्रिम बुद्धिमत्ता (एआई) को प्रयोगमार्फत बीमा उद्योगका चुनौती तथा सम्भावनाका विषयमा आफ्नो धारणा राखेका थिए।

आईएमई लाइफ इन्स्योरेन्स कम्पनी लिमिटेडको केन्द्रीय कार्यालय काठमाडौंको लैनचौरस्थित हाथवे कम्प्लेक्समा रहेको छ।