काठमाडौं। एनआईसी एशिया बैंकले आफ्ना ग्राहकहरूलाई आफ्नो खातामा स्थायी लेखा नम्बर (PAN) र ईमेल ठेगाना अद्यावधिक गर्न अनुरोध गरेको छ।

बैंकका अनुसार, ग्राहकको खाताबाट काटिने कर विवरण “आयकर ऐन २०५८” बमोजिम नेपाल सरकार, अर्थ मन्त्रालय, आन्तरिक राजश्व विभागमा समावेश गर्न प्यान अद्यावधिक गर्नु अनिवार्य छ। ग्राहकहरूले बैंकको पोर्टल वा मोबाइल बैंकिङ एप मार्फत “PAN अद्यावधिक” विकल्पमा ट्याप गरी आफ्नो प्यान यथाशीघ्र अपडेट गर्न सक्ने व्यवस्था गरिएको छ। यसका साथै, बैंकको जुनसुकै शाखा कार्यालयमा गएर पनि प्यान अद्यावधिकको लागि आवेदन दिन सकिनेछ।

बैंकले जनाएको छ कि प्यान अद्यावधिक भएपश्चात् ब्याजकर विवरण सो प्यानमा प्रविष्ट हुने भएकाले करकट्टी प्रमाणपत्र र कर चुक्ता प्रमाणपत्र प्राप्त गर्न सहज हुनेछ र बैंकमा प्रत्यक्ष जाने आवश्यकता कम हुनेछ। तर, प्यान अद्यावधिक नगरिएकाले करकट्टीमा समस्या आएमा बैंक जिम्मेवार नहुने पनि स्पष्ट गरिएको छ।

साथै, बैंकले ग्राहकहरूलाई आफ्नो खातामा ईमेल ठेगाना अद्यावधिक गर्न पनि अनुरोध गरेको छ। बैंकको भिडियो केवाईसी वा मोबाइल बैंकिङ एपमार्फत ईमेल ठेगाना अपडेट गर्न सकिन्छ। ग्राहकहरूले चाहनु भएमा बैंकको शाखा कार्यालय वा ग्राहक सम्पर्क केन्द्रमा (फोन: १६६०–०१–७७७७१, ०१–५९७०१०१) सम्पर्क गरी सेवा लिन सक्ने व्यवस्था गरिएको छ।

एनआईसी एशिया बैंकका सहायक प्रमुख कार्यकारी अधिकृत (प्रमुख सूचना अधिकारी) राजेश रावलले ग्राहकहरूलाई यथाशीघ्र प्यान र ईमेल ठेगाना अद्यावधिक गर्न सुझाव दिएका छन्, जसले बैंकिङ्ग सेवा र कर प्रक्रियालाई अझ सहज बनाउने विश्वास गरिएको छ।