काठमाडौं। महाशिवरात्रिको पावन अवसरमा काठमाडौँको भालेश्वर महादेव मन्दिर परिसरमा विशेष भजन उत्सव आयोजना हुने भएको छ। आइतबार दिनभर सञ्चालन हुने उक्त कार्यक्रममा पोखराको चर्चित युवा भजन समूहले विशेष प्रस्तुति दिने आयोजकले जनाएको छ।

दिउँसो २ बजेदेखि ५ बजेसम्म उत्तम बराल र जुपिटर पौडेलसहितको टोलीले भक्तिमय भजन प्रस्तुत गर्नेछ। कार्यक्रममा सहभागी भक्तजनहरूले सामूहिक भजन–कीर्तनमा सहभागी भई आध्यात्मिक आनन्द लिन सक्नेछन्। साँझ शिव धुनीसँगै महाआरती कार्यक्रमसमेत आयोजना गरिनेछ।

महाआरतीमा सहभागी हुन आउने भक्तजनहरूका लागि चन्द्रागिरी केबलकार ले साँझ साढे ४ बजेदेखि ५० प्रतिशत छुट प्रदान गर्ने जनाएको छ। भक्तजनहरूको सुविधाका लागि केबलकार सेवा साँझ ८ बजेसम्म सञ्चालन हुने बताइएको छ।

चन्द्रागिरी हिल्स लिमिटेड द्वारा आयोजित उक्त कार्यक्रमको उद्देश्य भालेश्वर महादेवको धार्मिक तथा सांस्कृतिक महत्त्वलाई थप प्रवर्द्धन गर्नु रहेको जनाइएको छ। आयोजकले सम्पूर्ण श्रद्धालु भक्तजन तथा भजन–संगीतप्रेमीलाई कार्यक्रममा सहभागी भई महाशिवरात्रिको विशेष अवसरलाई स्मरणीय बनाउन आग्रह गरेको छ।