काठमाडौं । माया खोला हाईड्रोपावर लिमिटेडले हकप्रद शेयर निष्काशनका लागि सिटिजन्स क्यापिटल लिमिटेडलाई निष्काशन तथा बिक्री प्रबन्धक नियुक्त गरेको छ। आज आयोजित एक समारोहबीच दुवै कम्पनीबीच औपचारिक सम्झौता सम्पन्न भएको हो।

सम्झौतापत्रमा माया खोला हाईड्रोपावर लिमिटेडका कार्यकारी अध्यक्ष दिनेश प्रसाद श्रेष्ठ तथा सिटिजन्स क्यापिटल लिमिटेडका प्रमुख कार्यकारी अधिकृत सबिर बादे श्रेष्ठले हस्ताक्षर गरेका छन्।

सम्झौता अनुसार सिटिजन्स क्यापिटल लिमिटेडले माया खोला हाईड्रोपावर लिमिटेडको १ करोड कित्ता (अक्षरेपी एक करोड मात्र) हकप्रद शेयर निष्काशनका लागि आवश्यक प्रक्रिया अगाडि बढाउनेछ। यसका लागि नेपाल धितोपत्र बोर्ड बाट स्वीकृति लिनु पर्ने सम्पूर्ण कार्यहरू तथा स्वीकृति पश्चात बिक्री व्यवस्थापनसम्बन्धी जिम्मेवारी पनि सिटिजन्स क्यापिटलले नै निर्वाह गर्नेछ।

माया खोला हाईड्रोपावर लिमिटेडको स्थापना २०६७ सालमा प्रा.लि.का रूपमा भएको थियो भने २०७३ सालमा कम्पनी लिमिटेडमा रूपान्तरण गरिएको हो। कम्पनीले संखुवासभा जिल्लामा १४.९ मेगावाट क्षमताको माया खोला जलविद्युत आयोजना निर्माण गरी २०८० असारदेखि व्यावसायिक विद्युत उत्पादन सुरु गरेको छ। उत्पादित विद्युत् नेपाल विद्युत प्राधिकरण लाई बिक्री गर्दै आएको कम्पनीले जनाएको छ।

यसअघि कम्पनीले २०७९ माघ महिनामा सर्वसाधारणका लागि प्राथमिक शेयर (आईपीओ) निष्काशन गरेको थियो। अब प्रस्तावित हकप्रद शेयर निष्काशनमार्फत कम्पनीले आफ्नो पूँजी संरचना सुदृढ गर्दै थप वित्तीय व्यवस्थापन गर्ने लक्ष्य राखेको छ।