काठमाडौं । प्रतिनिधि सभा सदस्य निर्वाचनअन्तर्गत समानुपातिकतर्फ हालसम्म ८० लाख ३३ हजार ८१० मत गणना भइसकेको निर्वाचन आयोग नेपाल ले जनाएको छ। पछिल्लो मतपरिणाम अनुसार राष्ट्रिय स्वतन्त्र पार्टी (रास्वपा) स्पष्ट अग्रतामा देखिएको छ।

आयोगका अनुसार रास्वपाले हालसम्म ३८ लाख ६५ हजार ५२० मत अर्थात ४८.१२ प्रतिशत मत प्राप्त गरेको छ। दोस्रो स्थानमा रहेको नेपाली कांग्रेस ले १३ लाख १० हजार ८४ मत अर्थात १६.३१ प्रतिशत मत पाएको छ।

त्यसैगरी नेपाल कम्युनिष्ट पार्टी (एमाले) ले ११ लाख १० हजार ५९३ मत अर्थात १३.८२ प्रतिशत मत प्राप्त गरेको छ भने नेपाल कम्युनिष्ट पार्टी ले ५ लाख ७१ हजार ८३१ मत अर्थात ७.१२ प्रतिशत मत पाएको छ।

यसैबीच श्रम संस्कृति पार्टी ले २ लाख ८० हजार ३३० मत अर्थात ३.४९ प्रतिशत मत प्राप्त गर्दै राष्ट्रिय प्रजातन्त्र पार्टी (राप्रपा) लाई पछाडि पारेको छ। राप्रपाले २ लाख ६९ हजार ८४५ मत अर्थात ३.३६ प्रतिशत मत प्राप्त गरेको छ।

अन्य दलहरूले हालसम्म ६ लाख २५ हजार ६०७ मत अर्थात ७.७९ प्रतिशत मत प्राप्त गरेका छन्। तर ती दलहरूबाट प्रत्यक्षतर्फ कुनै उम्मेदवार विजयी नभएकाले उनीहरूले पाएको मतका आधारमा सिट प्राप्त गर्ने छैनन्। उक्त मत थ्रेसहोल्ड पार गर्ने दलहरूबीच बाँडफाँड हुने व्यवस्था रहेको छ।

हालसम्मको यही अनुपात अन्तिमसम्म कायम रहेमा अनुमानित रूपमा रास्वपाले १८२ सिट, कांग्रेसले ३७ सिट, एमालेले २५ सिट, नेकपाले १५ सिट, श्रम संस्कृति पार्टीले ७ सिट र राप्रपाले ५ सिट प्राप्त गर्न सक्ने अनुमान गरिएको छ।