काठमाडौं ।आईएमई लाइफ इन्स्योरेन्स कम्पनी लिमिटेड र नेपाल इन्टरनेशनल हेल्थ सर्भिसेस बीच संस्थागत सहकार्यसम्बन्धी समझदारीपत्रमा हस्ताक्षर भएको छ। यस सहकार्यले जीवन बीमा सेवा र स्वास्थ्य सेवाबीच समन्वय गरी सेवाग्राहीलाई सहज, गुणस्तरीय र सुलभ सेवा उपलब्ध गराउने उद्देश्य राखेको छ।

समझदारीपछि आईएमई लाइफका कर्मचारी, अभिकर्ता तथा बीमितहरूले नेपाल इन्टरनेशनल हेल्थ सर्भिसेसमार्फत विभिन्न स्वास्थ्य सेवामा विशेष सुविधा पाउनेछन्। यस अन्तर्गत चिकित्सक र डेन्टल परामर्श निःशुल्क उपलब्ध हुनेछ भने प्रयोगशाला परीक्षण, एक्स–रे, अल्ट्रासाउण्ड, ईसीजी लगायत सेवामा अधिकतम ५० प्रतिशत छुट पाउन सकिनेछ। साथै, फुल बडी चेकअप, फिजियोथेरापी र अन्य स्वास्थ्य प्याकेजहरूमा पनि आकर्षक अफर उपलब्ध हुनेछ।

आईएमई प्रिभिलेज कार्ड भएका ग्राहकहरूलाई प्राथमिकतामा सेवा प्रदान गरिनेछ। आवश्यकता अनुसार होम केयर सेवा, विशेष नर्सिङ्ग केयर र स्वास्थ्य उपकरण व्यवस्थापनमा पनि सहजीकरण गरिनेछ, जसले बीमितहरूको स्वास्थ्य सुरक्षा थप मजबुत बनाउने विश्वास गरिएको छ।

यस सहकार्यले आईएमई लाइफका कर्मचारी तथा अभिकर्ताहरूको कार्यक्षमता र स्वास्थ्यमा सकारात्मक प्रभाव पार्ने साथै बीमित ग्राहकहरूको जीवनस्तर उकास्न योगदान दिने अपेक्षा गरिएको छ। दुबै संस्थाले संयुक्त रूपमा स्वास्थ्य सचेतना कार्यक्रम, विशेष स्वास्थ्य शिविर र सामाजिक उत्तरदायित्वका विविध कार्यक्रमहरू सञ्चालन गर्ने सहमति पनि गरेका छन्।

समझदारीपत्रमा आईएमई लाइफका तर्फबाट नायब प्रमुख कार्यकारी अधिकृत श्री खिलेन्द्र पौडेल तथा डा. रुप नारायण शाहले हस्ताक्षर गर्नुभएको हो।