पोखरा, चैत ११–१५ — नाडा अटोमोबाइल्स् एशोसिएसन अफ नेपालले आयोजना गर्ने दोस्रो नाडा प्रेजेन्ट्स् वाडा अटो शो २०२६ पोखराको लेकसाइड, तालबराही चोक स्थित खेल मैदानमा हुने भएको छ। पहिलो संस्करणमा प्रदर्शक र अवलोकनकर्ताहरूको प्रशंसनीय सहभागिता पछि, यस वर्षको प्रदर्शनी अझ व्यापक तथा आकर्षक हुने आयोजकहरूले बताएका छन्।

पोखरा महानगरपालिकाको प्रबद्र्धनमा आयोजना हुन लागेको प्रदर्शनीको व्यवस्थापन ग्लोबल एक्सपोजिसन एण्ड म्यानेजमेन्ट सर्भिसेज (जेम्स) ले गर्नेछ। प्रदर्शनीलाई सफल बनाउन विभिन्न प्रतिष्ठित साझेदारहरू सहकार्य गर्दैछन्, जसमध्ये राइड इनर्जी (पावर्ड बाई), शिखर इन्सुरेन्स, दिर्घायु पोखरा हस्पिटल (हस्पिटल पार्टनर), खल्ती एप (टिकटिङ्ग पार्टनर), युनियन पे (QR पार्टनर), टेम्पल बेल (हस्पिटालिटी पार्टनर) लगायतका संस्थाहरू छन्।

प्रदर्शनीमा १६ वटा ब्राण्डका ४–पाङ्ग्रे, ६ वटा ब्राण्डका लाइट कमर्शियल, १० वटा ब्राण्डका २–पाङ्ग्रे, एउटा हेभी कमर्शियल वाहनसहित लुब्रिकेन्ट, टायर, ग्यारेज उपकरण र वित्तिय संस्थाहरूका २० वटा स्टल रहने छन्। विशेष आकर्षणका रूपमा भिन्टेज कार शो र अत्याधुनिक रोबोट प्रदर्शनसमेत हुने जानकारी आयोजकहरूले दिएका छन्।

आयोजकहरूका अनुसार, पाँच दिन चल्ने प्रदर्शनीमा करिब ४५,००० आगन्तुकको सहभागिता रहने विश्वास गरिएको छ। खल्ती एपमार्फत टिकट खरिद गर्दा पहिलो १०० साधारण र विद्यार्थी टिकटमा क्रमशः ५०% र १००% क्यासब्याकको व्यवस्था गरिएको छ।

दोस्रो नाडा प्रेजेन्ट्स् वाडा अटो शो २०२६ ले अटो व्यवसाय प्रवर्द्धन मात्र नभई स्थानीय पर्यटन र आन्तरिक व्यवसायिक पहुँचमा समेत योगदान पुर्‍याउने आयोजकहरूको विश्वास रहेको छ।