ललितपुर । हालै सम्पन्न निर्वाचनपछि नयाँ संसद र सरकार गठन भएको परिस्थितिमा आर्थिक विकास, लगानीमैत्री वातावरण र रोजगारी सृजना लगायत बिषयमा केन्द्रित रहेर निजी क्षेत्र र प्रतिनिधिसभाका सदस्यहरुबीच ललितपुरमा नीति संवाद आयोजना गरिएको छ ।

नेपाल उद्योग वाणिज्य महासंघको आसन्न निर्वाचनको सन्दर्भमा आयोजित नीति संवादमा प्रतिनिधिसभाका सदस्य र निजी क्षेत्रका प्रतिनिधिहरुले आपसी सहकार्य गरी आर्थिक विकास, समृद्धि र लगानीमैत्री वातावरण निर्माणका लागि नीतिगत स्थायित्वमा जोड दिएका छन् । सो क्रममा प्रतिनिधिसभाका सदस्यहरुले मुुलुकको समृद्धि र रोजगारी सृजनामा निजी क्षेत्रको योगदानको चर्चा गर्दै यस क्षेत्रको समस्या र भोगिरहेको चुनौती सम्वोधनका लागि सहयोग गर्ने प्रतिवद्धता समेत जनाएका छन् ।

सत्तारुढ राष्ट्रिय स्वतन्त्र पार्टी रास्वपाका सांसद गणेश पराजुलीले निजी क्षेत्रसँग सहकार्यका लागि आफूहरु प्रतिवद्ध रहेको बताउनुभयो । कानून निर्माण र नीतिगत व्यवस्थाका लागि संसद र यसका समितिबाट गर्नुुपर्ने जिम्मेवारी पुरा गरिने उहाँको भनाइ थियो । आफूहरु आम जनताको व्यापक समर्थनसहित सरकारमा पुुगेको चर्चा गर्दै सांसद पराजुलीले युवा पुस्ताको चाहना अनुुसार मुलुकलाई अघि बढाउन सबै पक्षको सहकार्य आवश्यक भएको बताउनुुभयो ।

नेपाली कंग्रेसका सांसद नरेन्द्रराज केरुङले देशको अर्थतन्त्रलाई सबल तुुल्याउन निजी क्षेत्रको महत्वपूर्ण योगदान रहेको बताउनुभयो । निजी क्षेत्रको पूँजीलाई मुुलुकको विकासमा सदुपयोगका लागि प्रोत्साहित गर्नुुपर्ने बताउनुभयो । नीतिगत स्थायित्वलाई सरकारले ध्यान दिनुपर्ने र प्रतिपक्षी दलको तर्फबाट समेत सहयोग गर्ने प्रतिवद्धता उहाँले जनाउनुभयो ।

नेकपा एमालेका सांसद गुरु बरालले समग्र उद्यमी व्यवसायीको समस्या समाधानका लागि सहजीकरण गर्न आफूहरु तयार रहेको बताउनुुभयो । सरकारले निजी क्षेत्रलाई त्रसित गर्नुको साटो जवाफदेही व्यवहार गर्नुुपर्ने उहाँको भनाइ थियो ।

संवाद कार्यक्रमका बोल्दै नेपाल उद्योग वाणिज्य महासंघका वरिष्ठ उपाध्यक्ष अन्जन श्रेष्ठले गत निर्वाचनमा सबैजसो दलले आफ्नो घोषणापत्रमा निजी क्षेत्रको बिषयलाई प्राथमिकता दिएकोमा आभार प्रकट गर्नुभयो । निजी क्षेत्र बोझिलो कर र नीतिगत अस्थिरताबाट पीडित भइरहेको भन्दै त्यसलाई अन्त्य गर्न संसदको तर्फबाट भूमिका निर्वाह हुने अपेक्षा व्यक्त गर्नुभयो ।

जेन जी आन्दोलनपछि मुुलुकमा भएको राजनीतिक परिवर्तनलाई संस्थागत गर्न आफूहरु सरकार र संसदसँग सहकार्यका लागि तयार रहेको बताउनुभयो । निजी क्षेत्र र व्यवसायबाट हुुने नाफालाई गलत दृष्टिकोणबाट हेर्ने प्रवृत्ति अन्त्य हुुनुपर्ने उहाँको भनाइ थियो ।

संवाद कार्यक्रमका आयोजक एवम् महासंघका कार्यकारिणी सदस्य शिवप्रसाद घिमिरेले नयाँ सरकार र निजी क्षेत्र मिलेर आर्थिक क्रान्ति गर्नुृपर्ने बेला आएको बताउनुभयो । महासंघका स्थल यातायात तथा पारवहन समितिका सभापति समेत रहनुभएका घिमिरेले करको दर भन्दा पनि दायरा बढाउनुपर्ने आग्रह गर्नुभयो । निजी क्षेत्रले सुशासन र लगानीमैत्री ऐन कानून चाहेको भन्दै उहाँले सरकार र संसदबाट सहयोगको खाँचो रहेको बताउनुभयो ।

नीति संवाद कार्यक्रममा रास्वपाका मनिष झा, विदूषी राना, नितिमा कार्की, शुलभ खरेल, सुनिल खड्का, प्रकाशचन्द्र परियार लगायत सांसद सहभागी हुनुभएको थियो । त्यस्तै, महासंघ अन्तर्गतका वस्तुगत संघका ५० भन्दा बढी प्रतिनिधिहरुले आफ्ना धारणा व्यक्त गर्नुभएको थियो । कार्यक्रममा महिला उद्यमी एवम नेपाल कृषि मेसिनरी संघकी उपाध्यक्ष सुनिता नेमाफुकीले नीति संवाद आयोजना गर्नुको औचित्य र महत्वबारे चर्चा गर्नुभएको थियो ।