काठमाडौँ । कामना सेवा विकास बैंक लिमिटेडले नयाँ वर्ष २०८३ को अवसरमा “वित्तीय साक्षरता कथा संग्रह” तथा सम्बन्धित भिडियो सामग्री सार्वजनिक गरेको छ। बैंकले वित्तीय साक्षरता अभिवृद्धि गर्ने आफ्नो अभियानलाई थप प्रभावकारी बनाउन यस्तो पहल गरिएको जनाएको छ।

बैंकका प्रमुख कार्यकारी अधिकृत दिनेश थकालीले उक्त कथा संग्रह अनावरण गरेका हुन्। उनले वित्तीय साक्षरता केवल सूचना प्रदान गर्ने विषय नभई व्यवहार परिवर्तनसँग जोडिएको प्रक्रिया भएको उल्लेख गर्दै कथा र भिडियो सामग्रीमार्फत सन्देश अझ प्रभावकारी रूपमा जनमानससम्म पुग्ने विश्वास व्यक्त गरे।

कथा संग्रहमा दैनिक जीवनसँग सम्बन्धित वित्तीय निर्णय, बचतको महत्व, जिम्मेवार खर्च, बैंकिङ सेवाको प्रयोग तथा आर्थिक योजना जस्ता विषयलाई सरल र रोचक ढंगले प्रस्तुत गरिएको छ। बैंकका अनुसार, उक्त सामग्री देशभरका विद्यालयहरूमा वितरण गरिनेछ, जसले विद्यार्थीहरूमा सानै उमेरदेखि बचत गर्ने बानी र वित्तीय अनुशासन विकास गर्न सहयोग पुर्याउनेछ।

यसैगरी, बैंकले आफ्ना ग्राहकहरूलाई लक्षित गर्दै विशेष बचत खाता खोल्ने ग्राहकलाई प्रोत्साहनस्वरूप खुत्रुकेसहित कथा संग्रह प्रदान गर्ने व्यवस्था मिलाएको छ। यसले बचत व्यवस्थापनलाई व्यवहारिक रूपमा प्रोत्साहन गर्ने अपेक्षा गरिएको छ।

अभियानअन्तर्गत कथा संग्रहलाई भिडियोमा रूपान्तरण गरी डिजिटल माध्यमबाट पनि प्रस्तुत गरिएको छ। भिडियो सामग्रीहरू प्रत्येक हप्तामा दुई दिन बैंकका आधिकारिक सामाजिक सञ्जालमार्फत सार्वजनिक गरिनेछन्। बैंकले यस माध्यमबाट विशेषगरी बालबालिका, युवा तथा सामाजिक सञ्जाल प्रयोगकर्ताहरूलाई आकर्षित गर्ने लक्ष्य राखेको जनाएको छ।

बैंकले वित्तीय साक्षरता अभिवृद्धि आजको आवश्यकता भएको उल्लेख गर्दै यस्ता कार्यक्रमहरूलाई आगामी दिनमा अझ विस्तार गर्दै लैजाने प्रतिबद्धता व्यक्त गरेको छ। साथै, समुदायस्तरमा वित्तीय पहुँच विस्तार गर्दै जिम्मेवार बैंकिङ अभ्यास प्रवर्द्धन गर्ने लक्ष्य रहेको जनाएको छ।