बुटवल। निक्षेप तथा कर्जा सुरक्षण कोषको केन्द्रीय कार्यालय र शाखा कार्यालय बुटवलको संयुक्त आयोजनामा कर्जा सुरक्षण सम्बन्धी गोष्ठी तथा कर्जा दाबी सम्बन्धी सफ्टवेयरको अभिमुखिकरण कार्यक्रम सम्पन्न भएको छ।

बुटवलस्थित ड्रिमल्याण्ड गोल्ड रिसोर्ट एण्ड होटलमा आयोजित एक दिने उक्त कार्यशाला गोष्ठीमा विभिन्न बैंक तथा वित्तीय संस्थाका प्रतिनिधिहरूको सहभागिता रहेको थियो।

कार्यक्रममा राष्ट्रिय वाणिज्य बैंक, कृषि विकास बैंकको प्रदेश कार्यालय, विभिन्न लघुवित्त वित्तीय संस्थाहरू लगायतका प्रतिनिधिहरू सहभागी भएका थिए। कोषका प्रमुख कार्यकारी अधिकृत रमेश घिमिरे, नायव प्रमुख कार्यकारी अधिकृत उषा पौडेल, कर्जा विभाग प्रमुख विक्रान्त आचार्य तथा सूचना प्रविधि विभाग प्रमुख राजु के.सी. सहित कोषका कर्मचारीहरूको उपस्थिति रहेको थियो।

कार्यक्रमको सञ्चालन शाखा कार्यालय बुटवल प्रमुख बसन्त के.सी. ले गरेका थिए भने स्वागत मन्तव्य नायव प्रमुख कार्यकारी अधिकृत उषा पौडेलले दिएकी थिइन्।

कार्यक्रममा कर्जा सुरक्षण कार्यक्रम तथा भावी योजनाबारे कर्जा विभाग प्रमुख विक्रान्त आचार्यले जानकारी दिएका थिए। साथै, नयाँ सञ्चालनमा आउन लागेको कर्जा सुरक्षण सम्बन्धी सफ्टवेयरबारे सूचना प्रविधि विभाग प्रमुख राजु के.सी. ले प्रस्तुति दिएका थिए।

सहभागी संस्थाका प्रतिनिधिहरूले विभिन्न जिज्ञासा राखेका थिए, जसको जवाफ कोषका प्रमुख कार्यकारी अधिकृत रमेश घिमिरेले दिएका थिए।

कोषका अनुसार वार्षिक नीति तथा कार्यक्रमअनुसार बैंक तथा वित्तीय संस्थासँग निरन्तर छलफल गर्दै कर्जा सुरक्षण प्रणालीमा देखिएका समस्या पहिचान गर्ने र सुझाव संकलन गर्ने उद्देश्यले सबै प्रदेशमा यस्ता गोष्ठी सञ्चालन गर्ने लक्ष्य लिइएको छ।