चितवन। कामना सेवा विकास बैंक लिमिटेडले आफ्नो संस्थागत सामाजिक उत्तरदायित्व (CSR) अन्तर्गत श्री जनकल्याण आधारभूत विद्यालय, सुनहीमा अध्ययनरत विद्यार्थीहरूका लागि स्टेशनरी तथा शैक्षिक सामग्री वितरण गरेको छ।

बैंकको शाखा कार्यालय सर्दीमार्फत गरिएको उक्त कार्यक्रममा आर्थिक रूपमा कमजोर अवस्थाका विद्यार्थीहरूलाई लक्षित गरी विभिन्न शैक्षिक सामग्रीहरू हस्तान्तरण गरिएको हो।

बैंकका नारायणगढ क्षेत्र प्रमुख सुरेन्द्र भण्डारीले विद्यालय व्यवस्थापन समितिका अध्यक्ष दल बहादुर सिन्जलीलाई सामग्री हस्तान्तरण गर्नुभएको थियो। विद्यालयमा नर्सरीदेखि कक्षा ८ सम्म अध्ययनरत १३८ जना विद्यार्थीलाई शैक्षिक सामग्री वितरण गरिएको जनाइएको छ।

वितरण गरिएका सामग्रीहरूमा वर्णमाला तथा अंकसम्बन्धी चार्ट, एबीसीडी चार्ट, हप्ताका दिन र महिनासम्बन्धी चार्ट, नर्सरी तहका अध्ययन सामग्री, पेन्सिल, कापी, कलर तथा खेलमुखी शिक्षण सामग्रीहरू समावेश थिए।

कार्यक्रममा बोल्दै विद्यालय व्यवस्थापन समितिका अध्यक्ष सिन्जलीले बैंकको सहयोगप्रति धन्यवाद व्यक्त गर्दै यस्ता सामग्रीहरूले विद्यार्थीहरूको सिकाइ प्रक्रिया सहज र प्रभावकारी बनाउन सहयोग पुग्ने बताउनुभयो।

त्यस्तै, बैंकका क्षेत्र प्रमुख भण्डारीले यस्ता कार्यक्रमहरूले सामुदायिक विद्यालयका विद्यार्थीहरूको पठनपाठनमा सकारात्मक प्रभाव पार्ने र शिक्षामा पहुँच बढाउन सहयोग गर्ने विश्वास व्यक्त गर्नुभयो।

कार्यक्रममा बैंकका कर्मचारी, विद्यालयका प्रधानाध्यापक, शिक्षक तथा विद्यार्थीहरूको उपस्थिति रहेको थियो। बैंकले आगामी दिनहरूमा पनि यस्ता शैक्षिक तथा सामाजिक कार्यक्रमलाई निरन्तरता दिने जनाएको छ।