काठमाडौं । आइएमई लाइफ इन्स्योरेन्स कम्पनी लिमिटेडले चालु आर्थिक वर्षको तेस्रो त्रैमाससम्म उत्साहजनक वित्तीय प्रगति हासिल गरेको छ। कम्पनीले सार्वजनिक गरेको विवरणअनुसार नाफादेखि बीमाशुल्क आर्जन, जीवन बीमा कोष र लगानीसम्म अधिकांश सूचकमा सुधार देखिएको हो।

चैत मसान्तसम्म कम्पनीले ३६ करोड ७९ लाख रुपैयाँ खुद नाफा कमाएको छ। अघिल्लो आर्थिक वर्षको सोही अवधिमा कम्पनीको नाफा ३६ करोड ६३ लाख रुपैयाँ रहेको थियो।

कम्पनीको खुद बीमाशुल्क आर्जनमा उल्लेख्य वृद्धि भएको छ। गत वर्षको ३ अर्ब ६० करोड ३५ लाख रुपैयाँको तुलनामा यस वर्ष यस्तो आर्जन ३९.१८ प्रतिशतले बढेर ५ अर्ब १ करोड ५१ लाख रुपैयाँ पुगेको छ।

त्यस्तै, जीवन बीमा कोष पनि मजबुत बन्दै गएको छ। एक वर्षको अवधिमा ४२ प्रतिशतले वृद्धि भएर कोषको आकार १६ अर्ब ८३ करोड १० लाख रुपैयाँ पुगेको कम्पनीले जनाएको छ।

यस अवधिमा कम्पनीको कुल आम्दानी ६ अर्ब १७ करोड ८५ लाख रुपैयाँ पुगेको छ भने कुल खर्च ५ अर्ब ८१ करोड ६ लाख रुपैयाँ रहेको छ। कम्पनीले अभिकर्ताहरूलाई ४३ करोड ६४ लाख रुपैयाँ कमिशन वितरण गरेको जनाएको छ।

कम्पनीको प्रतिशेयर आम्दानी ९ रुपैयाँ ८१ पैसा र प्रतिशेयर नेटवर्थ १३१ रुपैयाँ ४९ पैसा पुगेको छ। सोल्भेन्सी अनुपात २.५९ प्रतिशत कायम रहेको कम्पनीले जनाएको छ।

हाल ५ अर्ब रुपैयाँ चुक्ता पूँजी रहेको कम्पनीको महाविपत्ति कोषमा २९ करोड ९५ लाख रुपैयाँ सञ्चित छ। साथै, कम्पनीले २० अर्ब ७५ करोड रुपैयाँभन्दा बढी लगानी विस्तार गरेको जनाएको छ।