काठमाडौं । होटल व्यवसायी महासंघ नेपाल का अध्यक्ष, पदाधिकारी तथा सदस्यहरुलाई प्रमाणपत्र वितरण गरिएको छ । देशभरबाट काठमाडौं आएका होटल व्यवसायीहरुलाई एक कार्यक्रमका बीच प्रमाणपत्र हस्तान्तरण गरिएको हो ।

कार्यक्रममा सुरेश श्रेष्ठ, नेपाल उद्योग वाणिज्य महासंघ का नवनिर्वाचित वस्तुगततर्फका उपाध्यक्ष नरेशलाल श्रेष्ठ तथा नेपाल पर्यटन बोर्ड का कामु सिइओ हिक्मतसिंह ऐर लगायतको उपस्थिति रहेको थियो ।

प्रमाणपत्र हस्तान्तरण कार्यक्रममा बोल्दै महासंघका नवनिर्वाचित अध्यक्ष टि आर भण्डारी ले नीतिगत सुधारका लागि सशक्त आवाज उठाउने तथा महासंघलाई अझ प्रभावकारी बनाउने प्रतिबद्धता व्यक्त गरे । उनले नेपालको पर्यटन प्रवर्द्धनका लागि सबै संघसंस्थासँग सहकार्य गरेर अघि बढ्ने बताए ।

त्यसैगरी, हिक्मतसिंह ऐर ले महासंघसँग सहकार्य गर्न पर्यटन बोर्ड तयार रहेको बताए । कार्यक्रममा नरेशलाल श्रेष्ठ ले होटल व्यवसायीलाई उद्योगसरह सुविधा उपलब्ध गराउन तथा अनावश्यक झन्झट हटाउन सरकारसँग माग गरे ।

सबै पक्षका धारणा सुनेपछि सुरेश श्रेष्ठ ले पर्यटन व्यवसायीका समस्या समाधानका लागि एकद्वार प्रणालीमार्फत काम अगाडि बढाउने दिशामा आवश्यक पहल गर्ने आश्वासन दिए ।

कार्यक्रममा महासंघका प्रदेश तथा जिल्लाका अध्यक्षसहित अन्य वक्ताहरुले पनि पर्यटन प्रवर्द्धनमा जोड दिएका थिए ।