काठमाडौं । लक्ष्मी सनराइज क्यापिटल लिमिटेड र जेनेसिस भेन्चर्स लिमिटेडबीच प्रारम्भिक सार्वजनिक निष्कासन (आईपीओ) व्यवस्थापनसम्बन्धी सम्झौता भएको छ ।

सम्झौताअनुसार जेनेसिस भेन्चर्स लिमिटेडको प्रस्तावित २५ लाख कित्ता साधारण शेयर निष्कासनका लागि लक्ष्मी सनराइज क्यापिटल लिमिटेडले निष्कासन तथा बिक्री प्रबन्धकको भूमिका निर्वाह गर्नेछ ।

सम्झौतापत्रमा लक्ष्मी सनराइज क्यापिटलका प्रमुख कार्यकारी अधिकृत विजयलाल श्रेष्ठ तथा जेनेसिस भेन्चर्स लिमिटेडका अध्यक्ष अनुज राठीले हस्ताक्षर गरेका हुन् । सम्झौता कार्यक्रममा दुवै संस्थाका वरिष्ठ प्रतिनिधिहरूको उपस्थिति रहेको थियो ।

यस सहकार्यले नेपालको पुँजी बजारलाई थप सुदृढ बनाउनुका साथै सर्वसाधारणका लागि लगानीका अवसर विस्तार गर्ने विश्वास लिइएको छ ।

जेनेसिस भेन्चर्स लिमिटेड एक निजी बजार लगानी कम्पनी हो । कम्पनीले सूचीकृत नभएका इक्विटी अवसरहरूमा लगानी गर्दै उच्च वृद्धि सम्भावना भएका क्षेत्र तथा दीर्घकालीन मूल्य सिर्जनामा केन्द्रित भएर काम गर्दै आएको जनाएको छ ।

कम्पनीले बलियो आधार र विस्तारको सम्भावना भएका व्यवसायहरूको पहिचान तथा लगानीलाई प्राथमिकता दिँदै आएको छ । प्रस्तावित आईपीओले कम्पनीको भावी वृद्धि तथा रणनीतिक विस्तार योजनालाई थप सहयोग पुग्ने अपेक्षा गरिएको छ ।