नेपाल बैंक लिमिटेडमा खाता रहेका ग्राहकहरू र बैंकमा कार्यरत कर्मचारीहरूलाई काठमाडौँको दरबारमार्गमा रहेको मेधर्म क्लिनिक्स प्रा.लि.मा उपचार गर्दा लाग्ने शुल्कमा विशेष छुट प्रदान गर्ने सम्झौता भएको छ। २०८३ साल जेठ १९ गते मंगलबारका दिन भएको उक्त सम्झौता बमोजिम बैंकका ग्राहक तथा कर्मचारीहरूले मेधर्म क्लिनिक्सद्वारा तोकिएका विविध उपचार सेवामा लाग्ने कुल बिल रकममा १५ प्रतिशत छुट पाउने व्यवस्था गरिएको छ।

उक्त सम्झौतापत्रमा नेपाल बैंक लिमिटेडको तर्फबाट बजारीकरण तथा अनुसन्धान डिभिजन प्रमुख निर्मल सुवेदी र मेधर्म क्लिनिक्स प्रालिको तर्फबाट प्रमुख कार्यकारी अधिकृत डा. अनूप सुवेदीले हस्ताक्षर गर्नुभएको छ।

यस सहकार्यबाट नेपाल बैंकमा खाता रहेका ग्राहकहरू र कार्यरत कर्मचारीहरूले मेधर्म क्लिनिक्सद्वारा प्रदान गरिने सहुलियतपूर्ण स्वास्थ्य सेवाबाट प्रत्यक्ष रूपमा लाभान्वित हुन सक्ने विश्वास बैंकले लिएको छ। बैंकका प्रमुख सूचना अधिकारी प्रतिभा डंगोलका अनुसार नेपालभर २३१ शाखाहरू, २६६ एटीएम मेसिनहरू तथा ६१ एक्स्टेन्सन काउन्टरहरू मार्फत करिब २७ लाख ग्राहकहरूलाई वित्तीय सेवा पुर्‍याइरहेको यस बैंकले हाल ग्राहक सेवामा व्यापक सुधार गरी आधुनिक बैंकिङ प्रविधि मार्फत प्रतिस्पर्धी रूपमा अगाडि बढिरहेको छ।

बैंकले छिटोछरितो र गुणस्तरीय ग्राहक सेवामा जोड दिँदै युवा जनशक्ति मार्फत आधुनिक प्रविधिको समुचित प्रयोग गरिरहेकाले आम नेपालीमाझ नेपालको पहिलो बैंक ‘नेपाल बैंक’ प्रतिको आकर्षण दिनप्रतिदिन बढ्दै गएको विज्ञप्तिमा उल्लेख छ।