काठमाडौँ — अग्रणी फिनटेक कम्पनी आइएमई खल्ती लिमिटेड (IME Khalti Limited) र भिजन कन्सर्न आई क्लिनिक (Vision Concern Eye Clinic) बीच एक विशेष कर्पोरेट वेलनेस सम्झौता (MoU) भएको छ। पानीपोखरीस्थित आइएमई खल्तीका कर्मचारी तथा तिनका परिवारलाई आँखा स्वास्थ्य सम्बन्धी विशेष सुविधा उपलब्ध गराउने उद्देश्यले यो सम्झौता गरिएको हो।

सम्झौताअन्तर्गत आइएमई खल्तीका कर्मचारीहरूले निःशुल्क व्यापक आँखा परीक्षण, निःशुल्क चिकित्सक परामर्श र प्राथमिकताका साथ अपोइन्टमेन्टको सुविधा पाउनेछन्। यी स्वास्थ्य सेवाहरू भिजन कन्सर्नका बौद्ध, लाजिम्पाट र माकलबारीस्थित शाखाहरूमा उपलब्ध हुनेछन्।

चिकित्सा सेवाका अतिरिक्त कर्मचारीहरूलाई विशेष आर्थिक सुविधा समेत प्रदान गरिनेछ। जसअन्तर्गत छनोट गरिएका अप्टिकल उत्पादनमा ४० प्रतिशतसम्म छुट, ब्रान्डेड फ्रेममा २० प्रतिशत छुट तथा प्रिस्क्रिप्सन गिलास र कन्ट्याक्ट लेन्समा विशेष कर्पोरेट मूल्य उपलब्ध गराइनेछ।

यसका साथै भिजन कन्सर्नले आधुनिक डिजिटल जीवनशैलीका कारण देखिने डिजिटल आँखा थकान (Digital Eye Strain) सम्बन्धी विशेष जागरण कार्यक्रम पनि सञ्चालन गर्नेछ भने आइएमई खल्तीले आफ्ना कर्मचारीबीच यी सुविधाहरूको प्रचारप्रसार गर्नेछ। यो सहकार्य एक वर्षका लागि लागू रहनेछ र यसको सहज कार्यान्वयनका लागि दुवै संस्थाले आ-आफ्नो समन्वयकर्ता नियुक्त गर्नेछन्।