काठमाडौं। आईएमई लाइफ इन्स्योरेन्स लिमिटेडले आफ्नो संस्थागत साख मूल्याङ्कनमा महत्वपूर्ण उपलब्धि हासिल गरेको छ। केयर रेटिङ्स नेपाल लिमिटेडले कम्पनीको साखस्तर ‘केयर–एनपी बीबीबी प्लस’ बाट बढाएर ‘केयर–एनपी ए’ कायम गरेको हो।

कम्पनीका अनुसार यो स्तरोन्नतिले संस्थाको सुदृढ वित्तीय अवस्था, प्रभावकारी जोखिम व्यवस्थापन, सुधारोन्मुख व्यावसायिक कार्यसम्पादन, सुशासनप्रतिको प्रतिबद्धता तथा सरोकारवालामाझ कायम विश्वासलाई प्रतिबिम्बित गरेको छ।

‘केयर–एनपी ए’ साखस्तरले कम्पनीसँग आफ्ना वित्तीय दायित्व समयमै पूरा गर्ने पर्याप्त क्षमता रहेको तथा अघिल्लो मूल्याङ्कनको तुलनामा अझ सबल र विश्वसनीय संस्थाका रूपमा स्थापित भएको संकेत गर्दछ।

कम्पनी व्यवस्थापनले उक्त उपलब्धिलाई ग्राहक, कर्मचारी, अभिकर्ता, लगानीकर्ता तथा अन्य सरोकारवालाबाट प्राप्त विश्वास, सहयोग र निरन्तर साथको प्रतिफलका रूपमा लिएको जनाएको छ। साथै आगामी दिनमा ग्राहक सेवा, संस्थागत सुशासन, नवीनता र दीर्घकालीन वित्तीय स्थायित्वलाई अझ मजबुत बनाउँदै लैजाने प्रतिबद्धता व्यक्त गरेको छ।

‘भविष्य सुनिश्चित गर्ने’ मूल नाराका साथ स्थापित आईएमई लाइफ इन्स्योरेन्स नेपालका अग्रणी जीवन बीमा कम्पनीहरूमध्ये एक हो। कम्पनीले विभिन्न जीवन बीमा योजनामार्फत व्यक्ति तथा परिवारको आर्थिक सुरक्षा, बचत र भविष्य सुनिश्चित गर्ने उद्देश्यसहित सेवा प्रदान गर्दै आएको छ।

देशभर फैलिएको शाखा तथा उपशाखा सञ्जाल र हजारौं अभिकर्तामार्फत सेवा विस्तार गर्दै आएको कम्पनीले जीवन बीमाको पहुँच विभिन्न समुदायसम्म पुर्‍याएको जनाएको छ। ग्राहक केन्द्रित सेवा, डिजिटल प्रविधिको उपयोग, जिम्मेवार लगानी व्यवस्थापन तथा नवीन बीमा योजनामार्फत कम्पनीले नेपाली बीमा क्षेत्रमा आफ्नो छुट्टै पहिचान बनाउन सफल भएको दाबी गरेको छ।

व्यावसायिक गतिविधिसँगै कम्पनीले स्वास्थ्य, शिक्षा, वित्तीय साक्षरता, सामुदायिक विकास तथा सामाजिक उत्थानका क्षेत्रमा विभिन्न सामाजिक उत्तरदायित्व कार्यक्रम सञ्चालन गर्दै आएको छ। समाजमा सकारात्मक परिवर्तन ल्याउने उद्देश्यका साथ विभिन्न सामाजिक अभियानमा पनि कम्पनी सक्रिय रूपमा सहभागी हुँदै आएको छ।

कम्पनीले ‘केयर–एनपी ए’ साखस्तर प्राप्तिलाई केवल उपलब्धिमात्र नभई अझ उत्कृष्ट सेवा, उच्च व्यावसायिक मापदण्ड र वित्तीय सुदृढताप्रतिको जिम्मेवारीका रूपमा लिएको जनाएको छ। साथै आगामी दिनमा पनि बीमितहरूको भविष्य सुरक्षित गर्दै नेपालको बीमा क्षेत्रको विकासमा महत्वपूर्ण योगदान पुर्‍याउने विश्वास व्यक्त गरेको छ।