काठमाण्डौ — नेपालको पहिलो बैंक नेपाल बैंक लिमिटेडमा खाता रहेका ग्राहकहरू तथा बैंकमा कार्यरत कर्मचारीहरूलाई भारतको नयाँ दिल्ली, सरिता विहार (मथुरा रोड) स्थित इन्द्रप्रस्थ अपोलो अस्पतालमा उपचार गर्दा लाग्ने शुल्कमा विशेष छुट प्रदान गर्ने सम्झौतामा हस्ताक्षर भएको छ । उक्त सम्झौताबमोजिम नेपाल बैंक लिमिटेडमा खाता रहेका ग्राहकहरू र बैंकमा कार्यरत कर्मचारीहरूलाई इन्द्रप्रस्थ अपोलो अस्पतालको विविध सेवामा लाग्ने शुल्कहरूमध्ये बिल रकममा १० प्रतिशत छुट हुने व्यवस्था गरिएको छ ।

सम्झौतापत्रमा मिति २०८३ साल जेठ २९ गते बैंकको तर्फबाट सहायक प्रमुख कार्यकारी अधिकृत दीपेन्द्र राज काफ्ले र इन्द्रप्रस्थ अपोलो अस्पतालको तर्फबाट उप-प्रबन्धक विपिन शर्माले हस्ताक्षर गर्नुभयो । यस व्यवस्थाबाट नेपाल बैंक लिमिटेडमा खाता रहेका ग्राहकहरू र बैंकका कर्मचारीहरूले इन्द्रप्रस्थ अपोलो अस्पतालले प्रदान गर्ने उच्च स्तरीय उपचार सेवाबाट प्रत्यक्ष रूपमा लाभान्वित हुन सक्नेछन् ।

नेपालको पहिलो बैंकको रूपमा परिचित नेपाल बैंक लिमिटेडले निरन्तर ग्राहक केन्द्रित सेवा विस्तार गर्दै आइरहेको छ । यस समझदारीले बैंकका सेवाग्राहीलाई अन्तर्राष्ट्रिय स्तरको स्वास्थ्य सेवामा थप सुविधा पुर्‍याउने अपेक्षा गरिएको छ । नेपालभर २३१ शाखाहरू, २४६ एटीएम साथै ६१ एक्सटेन्सन काउन्टरमार्फत करिब २७ लाख ग्राहकहरूलाई वित्तीय सेवा पुर्‍याइरहेको यो बैंक हाल ग्राहक सेवामा व्यापक सुधार गरी आधुनिक बैंकिङ प्रविधिमार्फत बैंकिङ सेवा पुर्‍याई प्रतिस्पर्धी रूपमा अगाडि बढिरहेको छ ।

बैंकले छिटोछरितो र गुणस्तरीय ग्राहक सेवामा जोड दिँदै युवा जनशक्तिमार्फत नेपालभर बैंकिङ सेवा प्रदान गरिरहेको छ । दक्ष व्यवस्थापन, युवा कर्मचारी र आधुनिक प्रविधिको समुचित प्रयोग भएसँगै आम नेपालीमा नेपालको पहिलो बैंक नेपाल बैंकप्रतिको आकर्षण दिनप्रतिदिन बढ्दै गएको छ ।