काठमाडौं । नाडातर्फबाट अध्यक्ष सुरेन्द्रकुमार उप्रेतीको नेतृत्वमा गएको एक प्रतिनिधिमण्डलले उपत्यका ट्राफिक प्रहरी कार्यालयका नवनियुक्त प्रमुख सुरेशप्रसाद काफ्लेसँग भेटघाट गरी काठमाडौँ उपत्यकाको ट्राफिक व्यवस्थापनका सन्दर्भमा देखा परेका विभिन्न समस्याहरूका सम्बन्धमा विस्तृत छलफल गरेको छ । असार १ गते आयोजित उक्त छलफलका क्रममा उपत्यका ट्राफिक प्रहरी कार्यालयका नवनियुक्त प्रमुख काफ्लेले कार्यालय र नाडाबीच रचनात्मक तथा दीर्घकालीन उद्देश्यका विषयहरूमा सहकार्य गरेर अघि बढ्नुपर्ने बताउनुभयो ।

सोही क्रममा उहाँले पहाडी क्षेत्रमा चल्नुपर्ने ठूला सीसीका मोटरसाइकलहरू पनि काठमाडौँ सहरभित्र चल्ने गरेको गुणासो गर्नुहुँदै मोटरसाइकलको तुलनामा स्कुटरको दुर्घटना कम हुने गरेको तथ्य केलाउनुभयो । यसै क्रममा उहाँले नाडाले राजधानीमा ट्राफिक सचेतनामूलक कार्यक्रमहरू सञ्चालन गर्नुपर्ने कुरामा जोड दिँदै एआई (A.I.) प्रविधियुक्त ट्राफिक लाइट व्यवस्थापनका लागि समेत पहल गर्नुपर्ने बताउनुभयो । उहाँले सवारी साधन खरिद गर्ने हरेक ग्राहक, सर्भिस सेन्टर र पहिलो पटक सवारी साधन चलाउन लाइसेन्स लिने हरेक व्यक्तिले काठमाडौँ उपत्यका ट्राफिक प्रहरी कार्यालयबाट करिब एक घन्टा अवधिको छोटो प्रशिक्षण लिनुपर्ने व्यवस्थाका लागि आग्रह गर्नुभयो, जसबाट ट्राफिक व्यवस्थापनमा ठूलो सहयोग पुग्ने विश्वास उहाँले व्यक्त गर्नुभयो ।

छलफलका क्रममा नाडाका अध्यक्ष उप्रेतीले ट्राफिक कार्यालयसँग नाडाले विगतमा गरेको सहकार्यबारे चर्चा गर्नुभयो । सोही क्रममा उहाँले नाडाले आफ्नो आउँदो ५०औँ वार्षिक साधारण सभा अर्थात् स्वर्ण उत्सवको सन्दर्भमा यही असार १३ गतेदेखि १९ गतेसम्म राजधानीमा विभिन्न कार्यक्रमहरू सहित विशेष हप्ताव्यापी कार्यक्रम मनाउन लागेको जानकारी दिनुभयो । उक्त कार्यक्रमलाई थप भव्य र प्रभावकारी बनाउन काठमाडौँ उपत्यका ट्राफिक प्रहरी कार्यालयको भूमिका महत्त्वपूर्ण हुने भएकाले आवश्यक सहयोगका लागि उहाँले आग्रह समेत गर्नुभयो । नाडाका अध्यक्ष उप्रेतीले नाडाले स्टिकरमार्फत ट्राफिक जनचेतनामूलक कार्यक्रम सम्पन्न गर्ने जानकारी समेत दिनुभयो ।

सो छलफलका क्रममा नाडाका महासचिव मिलनबाबु मल्लले कार्यालयसँग पहिलेदेखि नै सहकार्य गर्दै आएकाले अहिले पनि नाडाले सहकार्य गरेरै अघि बढ्न चाहेको बताउनुभयो । उक्त छलफलमा नाडाका उपाध्यक्ष विक्रम सिंहानिया, सचिव मेघराज पौडेल र कोषाध्यक्ष पंकज अग्रवाल लगायतको उपस्थिति रहेको थियो र उहाँहरूले समेत आफ्नो धारणा व्यक्त गर्नुभएको थियो ।