काठमाडौँ। प्रभु बैंक लिमिटेडले ग्राहकलाई थप सहज र आधुनिक सेवा प्रदान गर्न ‘डिजिटल काउन्टर’ सञ्चालनमा ल्याएको छ। अंग्रेजी नयाँ वर्ष २०२५ को प्रारम्भसँगै डिजिटल बैंकिङलाई प्रवर्द्धन गर्ने उद्देश्यले बैंकले अत्याधुनिक सेवा केन्द्र ‘प्रभु डिजिटल क्लब’ सुरू गरेको हो।

अब ग्राहकहरूले बैंकको काउन्टरमा लाइनमा बस्नुपर्ने झन्झटबाट मुक्त हुँदै विभिन्न सेवा आफैं सजिलै लिन सक्नेछन्। बैंकले बबरमहलस्थित मुख्य कार्यालयमा यो सेवा सुरू गरेको छ भने चाँडै नै अन्य शाखाहरूमा पनि विस्तार गर्ने योजना रहेको छ।

 

प्रभु डिजिटल क्लबका प्रमुख सेवाहरू

नगद जम्मा र नगद रिसाइक्लिङ – कुनै पनि समय नगद जम्मा र फिर्ता गर्न सकिने।
चेक डिपोजिट – चेक डिपोजिट गरी क्लियरिङ प्रक्रिया सहज बनाइने।
स्टेटमेन्ट प्रिन्टिङ – खाताको स्टेटमेन्ट तत्काल प्रिन्ट गर्न मिल्ने।
एटीएम र केआइओएसके सेवा – नगद निकाल्न र जम्मा गर्न सहज सुविधा।

ग्राहकको अनुभवमा परिवर्तन

यस सुविधासँगै कार्यालय समय कुर्नुपर्ने बाध्यता हटेको छ। ग्राहकले बैंकिङ सेवा २४/७ उपभोग गर्न पाउने भएका छन्। आधुनिक प्रविधिको प्रयोगले बैंकिङलाई अझ सरल, सुरक्षित र ग्राहकमैत्री बनाउने बैंकको विश्वास छ।

प्रभु बैंकका अनुसार, यो सेवाले डिजिटल बैंकिङप्रतिको आकर्षण बढाउनुका साथै ग्राहकलाई समय र श्रमको बचत गर्नेछ। बैंकले ग्राहकहरूको आवश्यकता र सुझावलाई ध्यानमा राख्दै थप स्थानहरूमा सेवा विस्तार गर्ने योजना सार्वजनिक गरेको छ।