काठमाडौं । कुमारी बैंक लिमिटेडले आफ्नो २४औं वार्षिकोत्सव विभिन्न कार्यक्रमहरूको आयोजनाबीच धूमधामले मनाएको छ। यस अवसरमा बैंकले आफ्ना ग्राहक, शुभचिन्तक तथा सम्पूर्ण सहयोगीहरूप्रति कृतज्ञता व्यक्त गर्दै उत्कृष्ट सेवा प्रदान गर्ने प्रतिबद्धता दोहोर्याएको छ।

वार्षिकोत्सवको उपलक्ष्यमा बैंकले कर्मचारीहरूलाई आफ्नो सांस्कृतिक परम्परा अनुसार “परम्परागत भेषभूषा” लगाउन प्रेरित गरेको छ। यसबाट संस्थागत एकताका साथै सांस्कृतिक विविधतालाई सम्मान गर्ने बैंकको प्रयास झल्किएको छ। साथै, “बिबिधतामा एकता”को भावना बढाउँदै रक्तदान कार्यक्रम पनि आयोजना गरिएको छ, जसले सामाजिक दायित्व पूर्तिमा बैंकको भूमिका रेखाङ्कित गरेको छ।

२४ वर्षदेखि निरन्तर सेवा प्रदान गर्दै आएको कुमारी बैंकले देशभर ३०२ शाखा, ३१६ एटिएम, ५० एक्सटेन्सन काउन्टर तथा ५४ शाखारहित बैंकिङ्ग इकाईमार्फत अत्याधुनिक सेवा पुगाउँदै आएको छ। बैंकले भविष्यमा पनि सरल, सुलभ र उत्कृष्ट सेवा दिने प्रतिवद्धता जाहेर गरेको छ।

यसरी कुमारी बैंकले आर्थिक सेवासँगै सामाजिक र सांस्कृतिक जिम्मेवारी पूरा गर्ने अभियानलाई अगाडि बढाउँदै आफ्नो वार्षिकोत्सव मनाएको छ।