काठमाडौं । निक्षेप तथा कर्जा सुरक्षण कोष र अग्नी हायर पर्चेज प्राइभेट लिमिटेडबीच कृषि र यातायात सेवा सम्बन्धी व्यवसाय अन्तर्गतको कर्जा सुरक्षणका लागि सम्झौतापत्रमा हस्ताक्षर सम्पन्न भएको छ।

सम्झौतामा कोषका प्रमुख कार्यकारी अधिकृत रमेश घिमिरे र अग्नी हायर पर्चेजका महाप्रबन्धक अरुण राज उपाध्यायले हस्ताक्षर गर्नुभएको हो। कार्यक्रमको अवसरमा दुवै संस्थाका विभागीय प्रमुखहरु मन्दिरा थपलिया र विराट काजी राउतको उपस्थिति रहेको थियो।

सम्झौताअनुसार, अग्नी हायर पर्चेजले स्वरोजगार तथा व्यवसाय प्रवर्द्धनका लागि यातायात सेवा खरिदमा प्रवाह गरेको अधिकतम ३ करोड रुपैयाँ र व्यवसायिक कृषि उपकरण खरिदका लागि प्रवाह गरिएको अधिकतम ३ करोड रुपैयाँसम्मको कर्जा कोषबाट सुरक्षण गरिनेछ।

कर्जा असुली असम्भव भएको अवस्थामा, कोषले दाबी भइसकेपछि अधिकतम ८० प्रतिशतसम्म भुक्तानी दिने व्यवस्था रहेको छ।

यस सम्झौता मार्फत कोषले व्यवसाय विस्तारलाई नयाँ आयाम दिएको छ। अन्य हायर पर्चेज कम्पनी, बैंक तथा वित्तीय संस्थाहरूलाई समेत व्यवसाय विस्तारमा प्रेरणा मिल्ने विश्वास लिइएको छ। साथै, कृषि तथा यातायात क्षेत्रमा लगानी गर्न चाहने युवा उद्यमीहरूलाई कर्जा प्राप्त गर्न थप सहजता हुने अपेक्षा गरिएको छ।