काठमाडौं । नेपालको पहिलो बैंक नेपाल बैंक लिमिटेड र काठमाडौंको शंखमुलस्थित लिफ प्लस प्रा. लि. बीच एक सम्झौता सम्पन्न भएको छ । सम्झौताअनुसार, नेपाल बैंकमा कार्यरत कर्मचारीहरू तथा बैंकमा खाता रहेका ग्राहकहरूले लिफ प्लस प्रा. लि. द्वारा उत्पादन तथा बिक्री गरिने पर्यावरणमैत्री, सुपारीको पातबाट निर्मित घरायसी सामग्रीहरू (जस्तै प्लेट, कचौरा, थाल, चम्चा आदि) खरिद गर्दा विशेष छुट सुविधा पाउने भएका छन् ।

ग्राहकहरूले उक्त वस्तुहरू कम्पनीको वेबसाइट (www.leafplus.com.np
) वा सम्पर्क नम्बर ९८०१८७०२०८ / ९८०२३४४१७८ मार्फत खरिद गर्न सक्नेछन् । साथै, नेपाल बैंकको मोबाइल बैंकिङ एप प्रयोग गरी भुक्तानी गर्दा खरिद बिलमा २० प्रतिशतसम्म छुट प्रदान गरिने व्यवस्था गरिएको छ ।

उक्त सम्झौता पत्रमा मिति २०८२ साल असोज २७ गते (सोमबार) नेपाल बैंकको तर्फबाट सहायक प्रमुख कार्यकारी अधिकृत श्री प्रकाश कुमार अधिकारी र लिफ प्लस प्रा. लि.को तर्फबाट प्रमुख कार्यकारी अधिकृत श्री कोबित सिंह बानियाले हस्ताक्षर गर्नुभएको हो ।

यस सम्झौतामार्फत दुवै संस्थाले वातावरणमैत्री उत्पादनको उपयोग प्रवर्द्धन गर्दै डिजिटल भुक्तानी प्रणालीको प्रयोगलाई पनि प्रोत्साहन गर्ने लक्ष्य लिएका छन् ।