देउवा र सिटौला संग सती जान खोज्ने नेबिसंघका नेता बीच यसरी भयो हाना-हान,को-को पुगे अस्पताल
Sunday Feb 24, 2019
वि.सं.२०७५ फागुन १२ आइतवार ०८:५५
काठमाडौ फागुन १२ । नेपाली कांग्रेसको केन्द्रीय कार्यालय घेराउ गर्ने क्रममा नेपाल विद्यार्थी संघका दुई समूहबीच कुटाकुट भएको छ । घटनामा १० जना घाइते भएका छन् । संस्थापन पक्ष विद्यार्थी र सिटौला पक्षीय विद्यार्थीबीच झडप भएपछि प्रहरीले बल प्रयोग गरेको छ ।
संस्थापन पक्षीय विद्यार्थीले पार्टी र विद्यार्थी संघमा अनुशासन कायम राख्नुपर्ने भन्दै बिहानदेखि पार्टी कार्यालयमा प्रदर्शन गरेका थिए । सिटौला पक्षीय विद्यार्थीले नेपाल विद्यार्थी संघमा तत्काल तदर्थ समिति गठन गर्नुपर्ने र विधानअनुसार ३२ वर्षे उमेरहद लागू गर्नुपर्ने लगायतका माग राख्दै पार्टी कायालयमा धर्नामा थिए ।
नेपाल विद्यार्थी संघको विघटनपछि नयाँ समिति गठन गर्ने विषयमा शीर्ष नेतृत्वमै सहमति हुन नसक्दा विद्यार्थी संघ फरकफरक धारमा विभाजित भएको छ ।
यसैबीच नेपाल विद्यार्थी संघको विवाद चुलिँदै गर्दा गत बिहीबार पार्टी उपसभापति विमलेन्द्र निधिलाई संस्थापन इतर समूहका विद्यार्थीले दुव्र्यवहार गरेपछि विवाद चर्किदै गएकोे छ ।
महानगरीय प्रहरी परिसर ललितपुरका प्रवक्ता प्रहरी नायब उपरीक्षक कपिलराज बोहराले दुई समुहबीच कुटाकुट गर्दा प्रहरीले बल प्रयोग गर्नुपरेको जानकारी दिए । उनका अनुसार घटनामा विद्यार्थी नेता दीपेन्द्र क्षेत्रीलगायत १० भन्दा बढी घाइते भएका छन् । उनीहरुको स्टार हस्पिटलमा उपचार भइरहेको संघका नेता मोतीलाल भण्डारीले जानकारी दिए ।
























